Posted: 12/19/2011 02:51 PM IST

అసలు చంపటమే నేరమైనప్పుడు వారిని ముస్లింపద్ధతిలో 'హలాల్' చేసారా లేకపోతే పంజాబీ సిక్కుల పద్ధతిలో 'ఝట్కా' చేసారా అన్నది అర్థం లేని వాదం.  మద్యపానమే సంఘంలో పట్టిన చీడ, మధ్య, కింది శ్రేణి తరగతి కుటంబాల పాలిట శాపంగా భావిస్తుంటే అందులో ఇంతకమ్మారు, అంతకమ్మారు కూడానా అంటే, అది చట్ట పరిధిలోని వివాదం.  ఒక ప్రాంతంలో మద్య నిషేధం ఉన్నప్పుడు మద్యపానం క్రయవిక్యాలు జరిగితే అది నేరం.  అదే ప్రాంతంల నిషేధాన్ని ఎత్తివేసినప్పుడు అది న్యాయబద్ధం. 

డొక్కాడకపోయినా పరవాలేదు కానీ చుక్కపడకపోతేనే కానీ రోజు పూర్తైనట్టు కాని ప్రజానీకం బలహీనతను ఆధారంగా చేసుకుని,  కొందరు బడాబాబులు మందుబాబులను దోచుకుంటున్నారు.  అవినీతికి ఎక్కడ ఏమాత్రం సందు దొరికినా వదలని నాయకులకు ఈ వ్యసనానికి బానిసలైన అధిక సంఖ్యాకులకు నిత్యావసరంగా మారిపోయిన తాగుడు కాసులను నింపేందుకు మార్గంగా కనిపించింది.  ఇంకేముంది, రంగం సిద్ధమైంది.  సీసా మీదున్న గరిష్ట ధరకి ఎక్కువగా తీసుకుంటున్నా ఎందుకని అడిగే నాథుడు లేడు.  అవసరం అలాంటిది.  ఎవరైనా ధైర్యం చేసి అడిగితే, అదంతా కావాలంటే తీసుకో లేకపోతే పొమ్మంటారు.   అలవాటు పడ్డ ప్రాణాలు నరాలను తోడేస్తుంటే వాటి బాధను ఉపశమనం చెయ్యటానికి అధిక ధరలకే కొంటున్నారు.  ఇది చాలా జిల్లాల్లో చాలా కాలంగా సాగుతున్న తంతు. 

అదంతా సులభంగా చెయ్యగలిగింది కాదు.  దీనికోసం ముందుగా దుకాణదారులంతా సిండికేటై ధరలను నిర్ణయించుకోవాలి.  అందులో అధికారులందరికీ చేతులు తడపాలి.  అందులోని వాటా నాయకులదాకా పోతుంది.  అప్పుడే ఈ దందా కొన్నాళ్ళు నిలదొక్కుకుంటుంది.  ఇవన్నీ కాకుండా తాగటం సులభతరం చెయ్యాలి. అక్కడే కొనుక్కుని అక్కడే నిలబడి తాగెయ్యటం వలన బార్ వరకూ పోవలసిన అవసరం, అక్కడ ఎక్కువ డబ్బు ఖర్చు పెట్టే అవసరం పడకుండా దుకాణం దగ్గరే తాగేస్తుంటే దానికి మద్దతుగా డిస్పోజబుల్ గ్లాసులు, నీళ్ళప్యాకెట్లు, సోడా, మిక్చర్ ప్యాకెట్లు కూడా అక్కడే లభిస్తాయి.  దానితో విక్రయాలు విపరీతంగా పెరిగిపోయాయి.  అక్కడే తాగి, అక్కడే డోక్కుంటున్న సన్నివేశాలు సర్వసాధారణాలే కానీ ఎవరూ దీనికి అభ్యంతరం తెలపలేకపోతున్నారు.  స్థానికి పోలిసులు, ఎక్సైజ్ అధికారులు, ఇంకా ఛోటా బడా నాయకులకు ముడుపులు సకాలంలో ఒప్పందం ప్రకారం అందుతున్నంతకాలం ఈ దంధాకి ఢోకా లేదు.

అయితే అవినీతి నిరోధక శాఖ ఆకస్మిక తణిఖీల్లో ఈ విషయాలన్నీ బయటపడ్డాయి.  వారి దగ్గర ఉన్న పుస్తకాల్లో ఎవరెవరికి ఎంతెంత ఇచ్చారన్నది రాసి పెట్టుంది.  వాటిని ఏసిబి వారు తీసుకుని వెళ్ళారు.  ఈ విషయం మీద స్పందిస్తూ, ఎసిబి వారు ఆ నాయకుల పేర్లను బహిర్గతం చెయ్యాలని,  ఆ నాయకులను పదవుల్లోంచి తొలగించాలంటూ తెదేపా నాయకులు అక్కడక్కడా ఆందోళన సాగించి పట్టుబడుతున్నారు. 

-శ్రీజ