Posted: 12/17/2011 06:38 PM IST

లోక్ పాల్ బిల్లు తప్పక పెడతాం, లోక్ పాల్ ఈ శీతాకాలం సమావేశాల్లోనే ప్రవేశపెడతాం.  నుంచి ఏకాభిప్రాయం కుదరటం లేదని, సాధ్యమైనంత వరకూ ఈ సమావేశాల్లోనే లోక్ పాల్ పెడతాం అనే వరకూ వచ్చింది.  మాటలు ఇలా మారుతూ విషయం పల్చబడుతూ వస్తుందని ముందే తెలుసుకాబట్టి నాయకుల నాడి ఎరిగిన అన్నాహజారే 27 నుంచి దీక్ష ప్రారంభిస్తానని చెప్పటమే కాకుండా అందుకు తగ్గ ప్రయత్నాలు కూడా చేస్తుండటం పాలక వర్గంలో వణుకు పుట్టిస్తోంది. 

ఒక్క ఢిల్లీలో మాత్రమే దీక్ష చేస్తే చాలదని భావించిన అన్నా ఈ రోజు బెంగళూరులో ప్రసంగించారు.  రేపు చెన్నైలో ఎల్లుండి హైద్రాబాద్ లో అన్నా పర్యటించనున్నారు.  బెంగళూరులో ఈ రోజు ఫ్రీడమ్ పార్క్ లో జరిగిన బహిరంగ సభలో మాట్లాడుతూ, తను ఎవరికీ భయపడేది లేదని, చావంటే ఏ మాత్రం భయం లేదని, అవినీతి మీద ఇరవై ఐదు సంవత్సరాల నుంచి పోరాడుతున్నానని, ఇది కేంద్ర ప్రభుత్వానికి ఆఖరి హెచ్చరిక అని చెప్తూ, పటిష్టమైన లోక్ పాల్ తెస్తారా లేక గద్దె దిగిపోతారా అంటూ కేంద్ర ప్రభుత్వాన్ని ప్రశ్నంచారు. 

దీనిమీద స్పందించిన ప్రధాన మంత్రి, దానిమీదనే కసరత్తులు చేస్తున్నట్టుగానూ, వీలయితే ఈ సమావేశంలోనే బిల్లుని ప్రవేశపెడతామని అన్నారు.

ఈరోజు అన్నా ప్రధాన మంత్రికి తాజా ఒక లేఖ రాస్తూ అందులో, ప్రభుత్వం అవలంబించే ధోరణి ఏమాత్రం బాగోలేదని, ఇంతవరకూ లోక్ పాల్ బిల్లు మీద హామీలు ఇచ్చుకుంటూ పోతున్నారు కానీ, ఈ నెల 23 వరకూ జరిగే పార్లమెంటు సమావేశాల్లో లోక్ పాల్ బిల్లు పెట్టటం అనుమానంగానే కనిపిస్తోందని తెలియజేస్తూ, సిబిఐ మీద నియంత్రణ ఒదిలిపెట్టలేకనే సిబిఐని లోక్ పాల్ కిందికి తీసుకుని రావటం లేదని, విచారణ చేపట్టే విభాగం లేకపోతే లోక్ పాల్ ఏం చెయ్యగలుగుతుందని ప్రశ్నస్తూ, పటిష్టమైన లోక్ పాల్ రాని పరిస్థితుల్లో 27 నుంచి మరోసారి దీక్ష, ఆతర్వాత జనవరిలో జైల్ భరో కార్యక్రమం తీవ్రతరమౌతుందని హెచ్చరిస్తూ,  ఇప్పటి వరకూ తానే చేస్తానన్న ప్రధాన మంత్రి ఇప్పుడు స్టాండింగ్ కమిటీకి అప్పజెప్పటం కేవలం ప్రజలను మోసగించటమేనని ఆరోపించారు.  

-శ్రీజ