Posted: 12/15/2011 04:36 PM IST

పార్లమెంటు ఈ రోజు కూడా సజావుగా సాగలేదు.  ముందు మధ్యాహ్నానికి ఆ తరువాత రేపటికి వాయిదా పడింది.  లోక్ పాల్ బిల్ మీద పార్టీలలో ఏకాభిప్రాయం కుదరటం లేదని, అందువలన ఇంకా సమయం పడుతుందని పార్లమెంట్ వ్యవహారాల మంత్రి పవన్ కుమార్ బన్సల్ ఈ రోజు మీడియా ప్రతినిదులకు తెలియజేసారు.  ఏది ఏమైనా ఈ శీతాకాలం సమావేశాల్లోనే లోక్ పాల్ బిల్లును ప్రవేశపెడతామని నమ్మకంగా చెప్పారు.   లోక్ పాల్ లో ప్రధాన మంత్రిని, కింది స్థాయి అధికారులను, సిబిఐ ని చేర్చాలా మినహాయించాలా అన్న దానిమీదనే ప్రముఖంగా అభిప్రాయ భేదాలు వస్తుండటంతో అందరి అభిప్రాయాలనూ సమన్వయ పరుస్తూ బిల్లుని రూపొందించటానికి ఇంకా సమయం పడుతుందని బన్సల్ వివరించారు.  ఇంకా వారం రోజులే ఉంది కదా మరి సమయం సరిపోతుందా అన్న ప్రశ్నకు, అందుకు చాలా కృషి చెయ్యాల్సి వస్తుంది, చేస్తాం కూడా అని చెప్పారు.

ఏదో విధంగా రోజులు డొలిపేసి సమావేశాలు అయిపోయాయని చెప్పి తప్పించుకోకుండా, అన్నా హజారే సమావేశాలను అవసరమైతే పొడిగించండి అని సూచించారు.  అన్నా హజారేకి ఏం చెప్తారు మరి అని అడిగిన ప్రశ్నకు, మేము ఆయనతో ఏమీ మాట్లడటం లేదు.  చట్టాలను తీసుకుని రావటం కోసమే ప్రజలు మమ్మల్ని ఎన్నుకున్నారు.  లోక్ సభలో 500 మంది సభ్యులు, రాజ్యసభలో 240 మంది సభ్యులు అలా ఎన్నుకోబడ్డారు.  మేమంతా మా శక్తివంచన లేకుండా పాటుబడుతున్నాం అని బన్సల్ సమాధానం చెప్పారు.

శ్రీజ