Posted: 12/08/2011 11:37 AM IST

హోం మంత్రి చిదంబరం మీద ఆరోపణ చేస్తూ ఢిల్లీ కోర్ట్ లో పిటిషన్ దాఖలు చేసిన జనతా పార్టీ అధ్యక్షుడు సుబ్రహ్మణ్య స్వామి స్వయంగా సాక్షిగా హాజరు కావటానికి అనుమతి లభించింది. 2 జి స్పెక్ట్రమ్ కుంభకోణంలో చిదంబరం ప్రమేయమున్నదని ఆరోపిస్తూ, అందుకు చిదంబరం ప్రధాన మంత్రికి రాసిన రహస్య లేఖను బహిర్గతం చేస్తూ, దానిమీద కోర్టులో కేసు వేసిన సుబ్రహ్మణ స్వామి డిసెంబరు 17 న సాక్షిగా హాజరు కావలసిందిగా ఢిల్లీ కోర్టు ఆదేశించింది.

2 జి నియామకాలను వేలం పద్ధతి ద్వారా చేసివుండాల్సిందని, అయితే అది కాస్తా అయిపోయిన సందర్భంగా ఆ విషయాన్ని అంతటితో మూసివెయ్యాలని ఆర్థిక శాఖ ద్వారా చిదంబరం ప్రధాన మంత్రికి రాసిన లేఖ సమాచార హక్కు చట్టం కింద చేజిక్కించుకున్న సుబ్రహ్మణ్య స్వామి దాని ఆధారంతో కోర్ట్ లో ఫిర్యాదు చెయ్యగా, ఆ లేఖ బహిర్గతం కావటం ప్రస్తుత ఆర్థిక శాఖా మాత్యులు ప్రణబ్ ముఖర్జీ, హోం మంత్రి చిదంబరం మధ్య అంతకు ముందునుంచే ఉన్న అగాధాన్ని ఇంకా పెంచివేసింది. అయితే ప్రధాన మంత్రి ముందుకు వచ్చి వారిద్దరి మధ్యా సయోధ్యకు బాట వెయ్యటమే కాకుండా, చిదంబరం పట్ల తన సంపూర్ణమైన విశ్వాసాన్ని ప్రకటించటంతో అప్పట్లో అంతర్గత పోరుకి తెరదించటమైంది కానీ చట్టపరిధిలో ఇంకా ఆ అంశం నానుతూనేవుంది. దానికి తోడు ప్రధాన నిందితుడు ఎ. రాజా కూడా పూర్తిగా తన తప్పే కాదని, అప్పటి ఆర్థిక మంత్రి చిదంబరానికి అన్నీ తెలిసే జరిగాయని చెప్తూ ధీమాగా ఉంటూ బెయిల్ కోసం కూడా ప్రయత్నించకపోవటం విశేషం.

శ్రీజ