Posted: 12/08/2011 10:04 AM IST

కాంగ్రెస్ పీసీసీ అధ్యక్షుడు బొత్స సత్తిబాబు తనదైన స్టైల్ లో జగన్ వర్గం పై ఫైర్ అయ్యాడు. జగన్ వర్గం పై వేటు వేయడానికి ఇదే సరైన సమయం అని, జగన్ వర్గ ఎమ్మెల్యేలపై వేటుకు 'దశలు' ఉండవని పీసీసీ అధ్యక్షుడు బొత్స సత్యనారాయణ స్పష్టం చేశారు. అనర్హత వేటు విషయంలో మంత్రులందరిదీ ఒకటే ఆలోచన అని తెలిపారు. అయితే తమకు హైకమాండ్ ఉందని గుర్తు చేశారు.

దమ్ముంటే 16మందిపైనా వేటు వేయాలంటూ జగన్ విసిరిన సవాల్‌పై మాట్లాడుతూ.. దానికి దమ్ము అవసరంలేదని, కొన్ని నిబంధనలుంటాయని, వాటిని విప్ చూసుకుంటారని చెప్పారు. అయితే.. అవిశ్వాస తీర్మానంపై ఓటింగ్ సందర్భంగా విప్‌ను ధిక్కరించినవారికి కొంత సమయం ఇవ్వాలనే నిబంధన ఉందని గుర్తు చేశారు. "ఎమ్మెల్యేలపై ఫిర్యాదు చేసేందుకు 15 రోజుల వ్యవధి ఉంటుంది. మొదటి రోజు ఫిర్యాదు చేసినా.. 14వ రోజు ఫిర్యాదు చేసినా ఒక్కటే'' అని చెప్పారు. 

పీఆర్పీలోని ఇద్దరు ఎమ్మెల్యేలకు, కాంగ్రెస్‌లో ఒకరిద్దరు తెలంగాణ ఎమ్మెల్యేలకు.. టీఆర్ఎస్ టికెట్లు ఇప్పిస్తామంటూ జగన్ వర్గం ప్రలోభపెట్టినట్లుగా తనకు సమాచారం ఉందని పీసీసీ చీఫ్ చెప్పారు. ఆ ఎమ్మెల్యేలు తనతో మాట్లాడిన సమాచారమే తాను చెబుతున్నానన్నారు. అయితే.. దీనితో టీఆర్ఎస్‌కు సంబంధం లేదన్నారు.