Posted: 11/30/2011 03:45 PM IST

రేపటి నుంచి 5 వరకూ శని ఆదివారాలు సహా జరగబోయే శాసన సభల సమావేశాల్లో ఏం జరగబోతోంది, ఎటువంటి సన్నివేశాలు చోటుచేసుకుంటాయి అనే ఉత్కంఠ అందరిలోనూ మొదలైంది. ముఖ్యంగా పార్లమెంటులో జరుగుతున్న గందరగోళం చూస్తుంటే రాష్ట్రంలో సమావేశాలు సజావుగా సాగేనా అన్న అనుమానం వస్తోంది. కానీ కేంద్రం పరిస్థితి వేరు. చిల్లర వ్యాపారంలో విదేశీ పెట్టుబడులను అనుమతించిన ప్రభుత్వం మీద అన్ని పార్టీలూ గుర్రుగా ఉన్నాయి. సమావేశాలు జరుగుతుండగా ఏకపక్ష నిర్ణయం తీసుకోవలసిన అవసరం ప్రభుత్వానికేమొచ్చిందని అన్ని పార్టీల వారూ నిలదీస్తున్నారు. మరో పక్క రాష్ట్ర విభజనల బంతులు కూడా కేంద్రం కోర్టులోనే ఉన్నాయి. ఇవన్నీ కాక లోక్ పాల్ బిల్లు ఒకటి గందరగోళాన్ని సృష్టించటానికి పొంచి చూస్తోంది.

కానీ రాష్ట్రంలో అటువంటివేమీ లేవు. ఉంటే గింటే ప్రభుత్వ పథకాలను విమర్శించవచ్చు. ఈ రోజు మండలి సభల్లోనూ శాసన సభల్లోనూ జరగవలసిన అజెండా సిద్ధం చేయటానికి సభాపతి నాదెండ్ల మనోహర్ అధ్యక్షతన సమావేశం (బిఏసి) జరిగింది. బిఏసి లో సమావేశాలకు నిర్ణయించిన కాలం సరిపోదని అభ్యంతరాలు తెలుపుతూ, ప్రతిపక్షాలు రైతు సమస్యలు, కరువు గురించి చర్చలుండాలని కోరారు. అవిశ్వాస నోటీసు ఇస్తామని తెదేపా ప్రకటించగా, తెలంగాణా తీర్మానం ప్రవేశపెట్టాలని తెరాస పట్టుబట్టింది. తెదేపా అవిశ్వాస తీర్మానాన్ని ప్రతిపాదిస్తే మద్దతిస్తామని తెరాస తరఫున తెరాస నాయకుడు ఈటెల రాజేందర్ ప్రకటించారు.

అవిశ్వాస తీర్మానం ప్రవేశపెట్టటమనేది తెదేపాకు అంతర్గత చర్చనీయాంశమైంది. ఒకవేళ అనుకున్న మద్దతు లభించకపోతే వీగిపోతుంది. అయితే దానివలన తెదేపా పెద్దగా నష్టపోయేదేమీ లేదు కానీ, ఒకవేళ కిరణ్ కుమార్ మీద అవిశ్వాస నిరూపణ జరిగితే పరిస్థితి ఏమిటి అని కూడా ఆలోచిస్తోంది. ఉప ఎన్నికలొస్తే ఇటు తెరాస, అటు జగన్ మద్దతుదార్లు, ఇప్పటి వరకూ అధికారంలో ఉన్న కాంగ్రెస్ పార్టీ, వీటి మధ్యలో తెదేపా అధికారంలోకి వచ్చేంత మెజారిటీని సంపాదించగలుగుతుందా అన్నది ప్రశ్న. ఒకవేళ ఆ పని చెయ్యలేకపోతే 2014లో వచ్చే సాధారణ ఎన్నికల్లో కూడా అధికారాన్ని పోగొట్టుకునే అవకాశం ఉంది. ఇదే తెదేపాను వేధిస్తున్న ప్రశ్న

శ్రీజ