ప్రజలను మభ్యపెడుతున్న పార్టీలు-అంతర్జాతీయ స్థాయిలో 'గీతం'

Posted: 08/20/2013 09:15 AM IST

 సమైక్యం పేరుతో ప్రజలను మభ్య పెడుతున్న పార్టీలను ఎండగట్టాలని మాజీ ఎంపీ, సీపీఎం కేంద్ర కమిటీ సభ్యుడు తమ్మినేని వీరభద్రం పిలుపునిచ్చారు. తూర్పుగోదావరి జిల్లా రాజమండ్రిలో జరిగిన 'భాషా ప్రయుక్త రాష్ట్రాల విభజన - సమస్యలు - ఉద్యమాలు' సదస్సులో ఆయన ముఖ్యఅతిథిగా పాల్గొని మాట్లాడారు. కాంగ్రెస్ పార్టీ తెలుగుజాతిని చీల్చి రాజకీయ ప్రయోజనం పొందాలనే దురుద్దేశంతో వ్యవహరిస్తున్నదని విమర్శించారు. విభజన నిర్ణయం తీసుకున్న కాంగ్రెస్, అంగీకారం తెలిపిన వైసీపీలకు చెందిన సీమాంధ్ర నాయ కులు సమైక్యాంధ్ర ఉద్యమానికి మద్దతు తెలపడం విడ్డూరంగా ఉందన్నారు. విభజన నిర్ణయాన్ని మార్చుకొనేలా వీరు ఆయా పార్టీల నాయకత్వంపై ఒత్తిడి తేవాలని లేదా ఆ పార్టీలకు రాజీనామాలు చేయాలని పిలుపునిచ్చారు. యూటీఎఫ్ రాష్ట్ర ప్రధాన కార్యదర్శి ఐ.వెంకటేశ్వరరావు మాట్లాడుతూ కొన్ని ఉపాధ్యాయ సంఘాలు తెలంగాణలో జై తెలంగాణ అంటూ కోస్తా, రాయలసీమలో సమైక్యాంధ్ర ఉద్యమం చేస్తున్నారన్నారు.

 

'గీతం'

 

గీతం వర్సిటీలోని మౌలిక సదుపాయాలు అంతర్జాతీయ స్థాయిలో ఉన్నాయని పపువాన్యూగినియా వర్సిటి బృందం ప్రశంసించింది. ప్రపంచంలోని విశిష్టమైన దేశాల్లో ఒకటిగా పేర్కొనే పపువా న్యూగినియాకి చెందిన పపువాన్యూగినియా విశ్వవిద్యాలయం అధికారిక బృందం గీతం విశ్వవిద్యాలయాన్ని సందర్శించింది. గీతం వీసీ ప్రొఫెసర్ జి.సుబ్రహ్మణ్యంతో సమావేశమైంది. ఈ సందర్భంగా వైస్ ఛాన్సలర్ మాట్లాడుతూ భారతదేశంలో అత్యంత వేగంగా అభివృద్ధి సాధిస్తున్న విశ్వవిద్యాలయాలోల గీతం ఒకటిగా గుర్తింపు పొందిందన్నారు. సమీప భవిష్యత్తులో కన్సల్టెన్సీ, పరిశోధనా ఫలితాలపై వచ్చే రాయల్టీ ఆధారంగా కోర్సుల ఫీజును తగ్గించే యోచనలో ఉన్నామన్నారు. విశాఖపట్నం, హైదరాబాద్, బెంగళూరుల్లో గీతం క్యాంపస్‌లను అనుసంధానం చేస్తూ ఈ-గ్రంథాలు, నిపుణుల వినియోగం వంటివి చేస్తున్నామన్నారు. ఇంజనీరింగ్‌తో పాటు ఫార్మశీ, సైన్స్, అంతర్జాతీయ వాణిజ్యం, న్యాయవిద్య, ఆర్కిటెక్చర్, దంతవైద్య విద్య వంటివి అందిస్తున్నామని వీసీ వెల్లడించారు. దేశంలోని ప్రముఖ కంపెనీలతో గల అవగాహనా ఒప్పందాలతో సిలబస్‌లో కాలానుగుణంగా మార్పులు చేస్తున్నామన్నారు.