ఎంఐఎం అధినేత అససుద్దీన్‌ ఓవైసి రహస్య సమావేశం?

Posted: 06/13/2013 07:35 PM IST

ఎంఐఎం అధినేత అససుద్దీన్‌ ఓవైసి నగరంలో ముస్లిం పెద్దలు , మేధావులతో రహస్యచర్చలు జరిపినట్లు తెలుస్తోంది. విశాఖ నగరానికి చేరుకున్న ఆయన రాత్రి పలువురు మేధావులను పార్టీలకతీతంగా పిలిచి సమావేశం అయ్యారు. విఐపిరోడ్డు ఎదురుగాగల ఓ మసీదులో ఈ సమావేశ జరిగింది. రానున్న ఎన్నికలను దృష్టిలోపెట్టుకుని చర్చలు జరిపినట్లు సమాచారం. ప్రస్తుత రాజకీయ పరిస్థితులు నేపధ్యంలో, కాంగ్రెస్‌తో ఎంఐఎం తెగతెంపులుచేసుకున్న నేపధ్యంలో ఈ సమావేశానికి ప్రాధాన్యత పెరిగింది. ముస్లింలు అందరిని ఏకతాటిపైకి తీసుకువచ్చి రానున్న ఎన్నికలను ఎదుర్కొనేందుకు సన్నద్ధమవుతున్నట్లు కనిపిస్తుంది. రాష్ట్రవ్యాప్తంగా జిల్లాల వారీగా పర్యటించి ముస్లిం నేతలను, ఎంఐఎం సానుకూలపరులను కలుసుకునే ప్రయత్నం చేస్తున్నారు.

కాంగ్రెస్‌కు సాధారణ ఎన్నికల్లో తగిన గుణపాఠం చెపుతారని గతంలోనే ప్రకటించారు. ఈ నేపధ్యంలోనే ఆయన రాష్ట్రంలోని మైనార్టీ ఓట్లను తనకు అనుకూలంగా మార్చుకునే ప్రయత్నం చేస్తున్నారు. రాష్ట్రంలో మైనార్టీ ఓట్లు విజయవకాశాలకు కీలకం కావడంతో ఆయన మైనార్టీలను ఒకతాటిపైకితెచ్చేందుకు ఈ సమావేశాలు నిర్వహిస్తున్నట్లు తెలుస్తోంది. ప్రధాన రాజకీయ పార్టీలు, మైనార్టీలకు తగిన ప్రాధాన్యత ఇవ్వకపోవడం, ఓట్‌బ్యాంకుగానే ఉపయోగించుకోవడంతో పలు విమర్శలు వినిపిస్తున్నాయి. తమ స్వంత ప్రయోజనాలకు ముస్లింలను ఆయా పార్టీలు వినియోగించుకుంటున్నాయనే ఆరోపణలు వున్నాయి. రానున్న ఎన్నికల్లో ఏ పార్టీతో పొత్తుపెట్టుకోవాలన్న అంశంపై కూడా చర్చించినట్లు ముస్లిం సోదరులు వెల్లడిస్తున్నారు.