Posted: 04/04/2013 03:25 PM IST

మంత్రి గంటాకు కొత్త వివాదాం చుట్టుకుంది. ఎమ్మెల్యే, మంత్రి హోదాలో ఉన్న గంటా లీజు ఒప్పందంపై సంతకం చేయడంపైనా ఇప్పుడు పెద్ద దుమారమే రేగుతోంది. అసలు ప్రజాప్రతినిధిగా ఉంటూ ప్రభుత్వ భూమి లీజుకు కుదుర్చుకోవడం, దానిపై కంపెనీ డెరైక్టర్ హోదాలో సంతకం చేయడం రాజ్యాంగ ఉల్లంఘన కిందకే వస్తుందని విశాఖలోని పలువురు మేధావులు తీవ్రంగా మండిపడుతున్నారు. ఈ ఒప్పందం ఆధారంగా అతని శాసనసభ సభ్యత్వం రద్దు చేయాలని ఫిర్యాదు చేయడానికి రాజ్యాంగపరంగా అవకాశాలున్నాయని, దీనిపై న్యాయ నిపుణులను కూడా సంప్రదిస్తున్నట్టు విశ్రాంత ఐఏఎస్ అధికారి, ఫోరం ఫర్ బెటర్ విశాఖ కన్వీనర్ ఈఏఎస్ శర్మ వివరించారు. మరోపక్క జిల్లాలో లోక్‌సత్తా పార్టీ నేతలు సైతం మంత్రి కబంధహస్తాల నుంచి గ్రంథాలయ సంస్థ భూమిని విడిపించడం కోసం ఇప్పటికే ఉద్యమం చేపట్టింది. స్థానికంగా పలు ఉద్యమాలు చేయడంతోపాటు ఆ పార్టీ అధినేత జేపీ విశాఖకు వచ్చినప్పుడు ఈ స్థలం చూపించారు. తాజాగా మంత్రి శైలజానాథ్‌కు వినతి పత్రం ఇచ్చారు. లీజు గడువు ముగిసిపోయినా ఇంకా ఒప్పందాన్ని రద్దు చేయకుండా అధికారులు మంత్రికి కొమ్ముకాస్తున్నారని ఆయనకు ఫిర్యాదు చేశారు. దీనిపై స్పందించిన శైలజానాథ్ ఈ నెలాఖరు లేదా మే నెలలో ఒప్పందంపై సమీక్షించి, నిబంధనల ప్రకారం చర్య తీసుకుంటామని హామీ ఇచ్చారు. విశాఖ నడిబొడ్డున రూ.40 కోట్ల విలువైన గ్రంథాలయ సంస్థ భూమి లీజు గడువు ముగిసినా ఇప్పటికీ నిర్మాణం మొదలుపెట్టకుండా స్థలం కాజేసే యత్నం చేస్తున్న మంత్రి గంటా తీరు వివాదాస్పదమవుతోంది. కేవలం షిప్పింగ్ రంగంలో మాత్రమే అనుభవం ఉన్న మంత్రికి చెందిన ప్రత్యూష కంపెనీకి వాణిజ్య భవనం నిర్మించడం ఎలా సాధ్యమవుతుందనే ప్రశ్నలు తలెత్తుతున్నాయి. అసలు అర్హతలేవీ పరిశీలించకుండా 33 ఏళ్ల లీజుకు అధికారులు ఎలా కట్టబెట్టారనే దానిపైనా అనేక అనుమానాలొస్తున్నాయి.