Posted: 12/14/2012 05:38 PM IST

వరుస మోసాలతో విశాఖ జిల్లా ఖాతాదారులు వణికిపోతున్నారు. సొమ్ము డిపాజిట్ చేస్తే రియల్‌ఎస్టేట్ భూమిని హామీగా ఇస్తామని నమ్మించిన మేజిక్ సంస్థ మోసంతో విలవిల్లాడిపోతున్నారు. జిల్లావ్యాప్తంగా ఈ సంస్థ సుమారు 15 వేల మందిని ముగ్గులోకి దించింది. సుమారుగా రూ.500 కోట్ల మేర డిపాజిట్లతో శఠగోపం పెట్టింది. కొంతకాలం క్రితం రఘనాథరెడ్డి మేనేజింగ్ డైరక్టర్‌గా మేజిక్ గ్రూప్ పేరుతో విశాఖలోని దొండపర్తి ఎస్‌బీఐ ఎదురుగా ఒక రియల్ ఎస్టేట్ సంస్థ ప్రారంభమైంది. అనకాపల్లి, నర్సీపట్నం, అచ్యుతాపురం తదితర ప్రాంతాలు, ఇతర జిల్లాల్లోనూ శాఖలను ప్రారంభించారు. పెద్ద ఎత్తున రియల్ ఎస్టేట్ వ్యాపారం చేస్తున్నామని, ఆయా ప్రాంతాల్లో భారీ వెంచర్లు రాబోతున్నాయని ప్రకటనలు గుప్పించారు. డిపాజిట్ చేస్తే మొదట్లో వారానికి రూ.లక్షకు రూ.8 వేలిస్తామన్నారు. ఆ తర్వాత ఆ మొత్తాన్ని రూ.10 వేలకు పెంచారు.

అప్పటివరకు రూ.10 వేలు, రూ.లక్ష డిపాజిట్‌లు చేసినవారు అప్పులు చేసి మరీ మరింత సొమ్మును జమ చేశారు. జిల్లావ్యాప్తంగా సంస్థ శాఖల్లో గురువారం ఉదయం నుంచి కార్యకలాపాలు నిలిచిపోయాయి. సంస్థ ప్రతినిధుల ఫోన్లు మూగబోయాయి. విశాఖ నగరం సహా నర్సీపట్నం, అనకాపల్లిలోని మేజిక్ గ్రూపు కార్యాలయాలకు తాళాలు పడ్డాయి. బోర్డులు కూడా అదృశ్యమయ్యాయి. దీంతో ఏం చేయాలో తెలియక ఖాతాదారులంతా నెత్తీనోరూ కొట్టుకుని రోదిస్తున్నారు. ఇటీవలే నర్సీపట్నంలో బోర్డు తిప్పేసిన ‘పట్నాల’ అనే సంస్థపై విచారణ పూర్తికాకుండానే రెండో సంస్థ అదేబాటలో నడవడం సంచలనమైంది.