Posted: 11/24/2012 02:52 PM IST

ఫీజు రీయింబర్స్‌మెంటు దరఖాస్తుల రిజ్రిస్టేషన్ గడువును రాష్ట్ర ప్రభుత్వం పొడిగించింది. తొలుత నిర్ణయించిన గడువు నవంబర్ 20తేదీ మంగళవారంతో ముగియగా, వివిధ కారణాల వల్ల నాలుగో వంతు మంది కూడా దరఖాస్తు చేసుకోలేదు. దీంతో వచ్చే నెల 15వ తేదీ వరకు దరఖాస్తు చేసుకోవడానికి గడువు ఇచ్చింది.
    ఈ ఏడాది కూడా ఫీజు రీయింబర్స్‌మెంట్ దరఖాస్తుల ఆన్‌లైన్ రిజ్రిస్టేషన్ మందకొడిగా సాగుతున్నది. ఇంటర్ నుంచి పోస్టు గ్రాడ్యుయేషన్ వరకు చదివే కొత్త విద్యార్థుల ఫీజు రీయింబర్స్‌ మెంటుకు గత నెల 20వ తేదీ నుంచి దరఖాస్తుల స్వీకరణ మొదలైంది. ఆన్‌లైన రిజ్రిస్టేషన్‌కు ఈ నెల 20వ తేదీని తుది గడువుగా నిర్ణయించింది.
       విశాఖ జిల్లా మొత్తం మీద 550 విద్యాసంస్థల్లో ఎస్సీ, ఎస్టీ, బీసీ విద్యార్థులు 50 నుంచి 60 వేల మంది వున్నట్టు అంచనా. వీరంతా ఫీజు రీయింబర్‌మెంట్‌కు దరఖాస్తు చేసుకోవచ్చు. కానీ గడువు ముగిసేనాటికి 12వేల దరఖాస్తులు వచ్చాయి. దరఖాస్తుతోపాటు రేషన్ కార్డు జెరాక్స్ కాపీని జత చేయాలన్న నిబంధన వుండడంతో పలువురు విద్యార్థులు దరఖాస్తు చేయలేదు. ఆయా విద్యార్థుల కుటుంబాల్లో చాలా మంది రేషన్ కార్డులు లేకపోవడమే ఇందుకు ప్రధాన కారణం. విషయం తెలుసుకున్న ప్రభుత్వం ఈ నిబంధనను సడలించింది.
       ఇంటర్ పూర్తి చేసి ఐటీఐలో, ఐటీఐ చేసి ఇంటర్‌లో చేరిన విద్యార్థుల దరఖాస్తులకే కాకుండా పీజీ చేసి బీఈడీలో చేరిన వారి దరఖాస్తులకు ఆన్‌లైన్‌లో చుక్కెదురైంది. వీటి ఆన్‌లైన్ రిజ్రిస్టేషన్‌కు సాఫ్ట్‌వేర్ సహకరించలేదు. అదే మాదిరిగా రెండేళ్ల విరామం తర్వాత దరఖాస్తు చేసుకున్న వారికి ఇదే అనుభవం ఎదురైంది.

...avnk