Posted: 04/10/2012 07:40 PM IST

విశాఖ జింక్ పరిశ్రమ మూసివేత దిశగా అడుగులు వేస్తుందా?...యాజమాన్యం వైఖరి, పరిస్థితులు చూస్తుంటే కావొచ్చునేమోననిపిస్తోంది. రెండు నెలల క్రితం ముడి సరుకు రావడం ఆలస్యమవుతోందనే కారణంతో పరిశ్రమలో ఉత్పత్తిని నిలిపివేసిన యాజమాన్యం త్వరలో మూసివేసేందుకు యోచిస్తున్నట్టు తెలిసింది.

ఇక్కడి పరిశ్రమలో జింక్, సల్ఫ్యూరిక్ యాసిడ్ తదితర ముడి పదార్థాలు తయారవుతుంటాయి. అయితే సంస్థకు కొన్నేళ్లుగా నష్టాలు వాటిల్లుతున్నట్టు యాజమాన్యం పేర్కొంటున్నది.ముడి సరుకు రావడం ఆలస్యమైందన్న సాకుతో రెండు నెలలుగా ఉత్పత్తిని నిలిపివేసింది. అయితే ఈ విషయాన్ని యాజమాన్యం బహిరంగంగా ప్రకటించలేదు. 1974లో ములగాడ గ్రామానికి సమీపంలో ఈ పరిశ్రమను ఏర్పాటుచేశారు. అప్పట్లో లెడ్ ప్లాంట్ కాలు ష్యం వల్ల పలువురు మృత్యువాత పడినట్లు ఆరోపణలు వచ్చాయి. దీంతో ఆ ప్లాంట్‌ను దాదాపుగా పన్నెండేళ్ల క్రితం మూసివేశారు. ప్రస్తుతం పరిశ్రమలో ఉత్పత్తి నిలిపివేసినా, కార్మికులకు జీతాలు ఇస్తున్నారు.