ఇంద్రకీలాద్రిపైకి వాహనాల నిలిపివేత- బీభత్సం

Posted: 10/25/2013 04:06 PM IST

విజయవాడలో కనకదుర్గమ్మ కొలువై ఉన్న ఇంద్రకీలాద్రి పర్వతం మీదకు అన్ని రకాల వాహనాల రాకపోకలను నిలిపివేశారు. విజయవాడతో పాటు కృష్ణా జిల్లాలోని పలు ప్రాంతాల్లో గత రెండు రోజులుగా భారీ వర్షాలు కురుస్తున్నాయి. దీంతో ఘాట్ రోడ్డు ప్రమాదకరంగా మారే అవకాశం ఉన్నందున అన్ని రకాల వాహనాల రాకపోకలను పూర్తిగా నిలిపివేసినట్లు ఆలయ అధికారులు తెలిపారు. అయితే, మెట్ల మార్గం మీదుగా మాత్రం అమ్మవారి దర్శనానికి భక్తులను అనుమతిస్తున్నారు. భక్తులకు ఎలాంటి ఇబ్బంది లేకుండా అన్ని రకాల ఏర్పాట్లు చేసినట్లు అధికారులు చెప్పారు.

 

బీభత్సం

కుండపోత వర్షం కురిసింది. ఈదురుగాలులకు చెట్లు కూలాయి. నాలుగు చోట్ల కొండచరియలు విరిగి పడ్డాయి. జనజీవనం అస్తవ్యస్తమైంది. రోజంతా ముసురే! 12 గంటల పాటు కురిసిన భారీ వర్షానికి విజ యవాడ రోడ్లు చెరువులను తలపించాయి. పాతబస్తీ జలదిగ్బంధంలో చిక్కుకుంది. వించిపేట నిండా మునిగింది. కొండ ప్రాంతాల నుంచి భారీ ఎత్తున వర్షపు నీరు రోడ్లమీదకు చేరింది. నైజాంగేట్ డ్రెయిన్ నుంచి మురుగునీటి పారుదలకు అవాంతరం ఏర్పడటంతో పెద్ద ఎత్తున చేరిన వర్షపు నీటితో వించిపేటను మురుగు ముంచెత్తిది. వించిపేట ప్రజలు భయభ్రాంతులకు గురయ్యారు. విద్యాధరపురం బస్‌డిపో వర్షపు నీటిలో చిక్కుకు పోయింది. ఇటీవలే ఈ డిపోను పూర్తిగా కాంక్రీట్ చేశారు. బస్సు బయటకు రావాలన్నా, పోవాలన్నా దినదినగండమే అయింది. సిబ్బంది ఈ నీటిని ఈదుకుంటూనే విధులకు హాజరు కావాల్సి వచ్చింది. ఈ డిపోలో పెద్ద ప్రమాదం తప్పిందనే చెప్పవచ్చు. సీఎన్‌జీ ప్లాంట్ నీటిలో చిక్కుకోలేదు. ఒక వేళ ఈ ప్లాంట్ నీటిలో చిక్కుకుని ఉంటే 200 ఆర్టీసీ బస్సు లు రోడ్డుమీదకు వచ్చే అవకాశమే ఉండేది కాదు. మోకాళ్ళ లోతున ఉన్న నీటిలోనే బస్సులను సీఎన్‌జీ ప్లాంట్‌కు తీసుకువెళ్ళి ఫిల్లింగ్ చేయించారు.

 

విజయవాడలో లోబ్రిడ్జి, బస్‌స్టేషన్ బ్రిడ్జి ల దగ్గర పెద్దఎత్తున నీళ్ళు నిలిచాయి. పీఎన్‌బీఎస్‌కు బస్సులు రావటం జాప్యం అయింది. కాళేశ్వరరావు మార్కెట్ సమీపంలో లోబ్రిడ్జి దగ్గర నీళ్ళు నిలిచిపోవటంతో ట్రాఫిక్ స్తంభిం చింది. సిదార్థ సెంటర్ మురుగునీటి తటాకంగా మారింది. మురుగునీటి వ్యవస్థను ఆధునీకరించకపోవటంతో సిద్ధార్థ సెంటర్‌తో పాటు, అ న్ని అంతర్గత రోడ్లపై మురుగు, వర్షపు నీరు ముంచెత్తింది. ఐదవ నెంబర్ రోడ్డుపై పెద్ద ఎత్తున నీరు నిలిచిపోయింది. పటమట స్కావెంజర్స్ కాలనీలో ఇళ్ళలోకి నీళ్ళు చేరాయి. లోతట్టు ప్రాంతాలన్నీ జలమయమయ్యాయి.

 

విజయవాడలో రోడ్లు అసలే అధ్వానంగా ఉన్నాయి. అన్నీ గోతుల మయం. దీనికి తోడు అభివృద్ధి పనులకు తీసిన గోతులు ఉండనే ఉన్నాయి. కూలిన వృక్షాలు ఈదురుగాలుల కారణంగా విజయవాడలో పలుచోట్ల వృక్షాలు నేలకూలాయి. చిట్టినగర్ సొరంగం మార్గంలో కొండచరియలు బలహీన పడటంతో చెట్టు కూలిపోయింది. సొరంగ మార్గంలో పడటంతో కాసేపు ట్రాఫిక్ స్థంబించింది. ఆ తర్వాత దానిని తొలగించారు. సీతారామపురం, నెహ్రూనగర్‌లలో చెట్టు నేలకూలాయి. మల్లిఖార్జున పేటలో రెండు చోట్ల, క్రీస్తురాజపురంలో కొండ చరియలు విరిగి ఇంటి పిట్టగోడ మీద పడ్డాయి. మూడు రోజులుగా మునిసిపల్ కార్మికులు సమ్మెలో ఉన్నారు. దీంతో విజయవాడలో 1000 మెట్రిక్ టన్నుల చెత్త పేరుకు పోయి ఉంది.