Posted: 04/03/2010 06:05 PM IST

విజయవాడ, మేజర్‌న్యూస్‌ : నగర క్రీడాకారులు ప్రపంచ విలువిద్య పోటీలలో బంగారు పతకం సాధించాలని నగర మేయరు యం.వి. రత్నబిందు ఆశాభావం వ్యక్తం చేశారు. శుక్రవారం గుణదల విజయలక్ష్మీ కాలనీలోని వి.యమ్‌.సి. జిల్లా ఆర్చరీ ఫీల్డ్‌ ఆవరణలో గతనెలలో మహారాష్ట్ర ఔరంగాబాద్‌లో జరిగిన జాతీయ విలువిద్య పోటీలలో పతకాలు సాధించిన వారికి అభినందన సభ ఏర్పాటు చేశారు.

ఈ కార్యక్రమంలో ముఖ్య అతిధిగా పాల్గొన్న ఆమె మాట్లాడుతూ విలువిద్య క్రీడలో నగర బాలబాలికలు విశేషంగా రాణించడం అభినందనీయమన్నారు. క్రీడాకారులకు నగరపాలక సంస్థ అండదండలు ఎప్పుడూ ఉంఆయని ఆమె హామీ ఇచ్చారు. ఆంధ్రా క్రికెట్‌ అసోసియేషన్‌ కార్యదర్శి గోకరాజు గంగరాజు మాట్లాడుతూ నగరంలో క్రీడాభివృద్ధికి ఆంధ్రా క్రికెట్‌ అసోసియేషన్‌ ముందుంటుందన్నారు.

క్రీడాకారులు క్రమశిక్షణతో సాధన చేస్తే ప్రపంచ ఛాంపియన్లు అవడం పెద్ద విషయం కాదన్నారు. ఎ.సి.ఎ. నిధి నుండి రూ. 2.5 లక్షలు నగరంలో ఆర్చరీ అభివృద్ధికి కేటాయిస్తున్నట్లు ప్రకటించారు. ఈ కార్యక్రమంలో జిల్లా క్రీడాభివృద్ధి అధికారి బి. సుధాకర్‌, కార్పోరేషన్‌ క్రీడాభివృద్ధి కార్యదర్శి అన్నే ప్రసన్న, కార్పోరేటర్‌ మాగంటి నరశింహ చౌదరి, చెరుకూరి సత్యనారాయణ, లెనిన్‌ తదితరులు పాల్గొన్నారు.

పతకాలు సాధించిన క్రీడాకారులు : రితుల్‌ ఛటర్జీ బ్యాంకాక్‌లో జరిగిన అంతర్‌ జాతీయ పోటీలలో జూనియర్‌ విభాగంలో ఒక బంగారు ఒక కాంశ్యం, నేషనల్‌ సబ్‌ జూనియర్‌ పోటీలలో వి. జ్యోతి సురేఖ వ్యక్తిగత కాంస్యం, టీం గోల్డ్‌ జి. కావ్య సబ్‌ జూనియర్‌ నేషనల్‌లో టీంగోల్డ్‌ వై. అనూషా రెడ్డి , సబ్‌ జూనియర్‌ నేషనల్‌లో టీం గోల్డ్‌ ఈ. సాహితి, సబ్‌ జూనియర్‌ నేషనల్‌ లో టీంగోల్డ్‌ సాధించారు. ఈ కార్యక్రమానికి హాజరైన నగర ప్రముఖులు క్రీడాకారులను అభినందించారు.