శివుడిని పూజిస్తే వచ్చే లాభాలు

Posted: 02/25/2014 04:35 PM IST

పరమేశ్వరుడిని కేవలం మహాశివరాత్రిరోజే కాదు.. ఏయే మాసాలయితే మనకు అందుబాటులో వున్నాయో ఆయా మాసాలకు.. సంబంధిత వస్తువులు, పదార్థాలు, పూలతో పూజించుకోవచ్చు. ఇలా చేయడం వల్ల మనకు ఫలితాలు కూడా లభిస్తాయి. 

చైత్రమాసంలో శంకరుని దర్భ పువ్వులతో పూజిస్తే బంగారం వృద్ధి చెందుతుంది. 

వైశాఖమాసంలో శివుని నేతితో అభిషేకిస్తూ, తెల్లని మందారాలతో పూజిస్తే వారికి అశ్వమేధఫలం కలుగుతుంది. 

జ్యేష్ఠ మాసంలో పెరుగుతో అభిషేకిస్తూ, తామరపువ్వులతో పూజిస్తే పరమగతి కలుగుతుంది. 

ఆషాఢమాసంలో కృష్ణ చతుర్ధశినాడు తలస్నానం చేసి, శివునికి గుగ్గిలంతో ధూపం వేసి, తోడిమాలతో కూడిన పుష్పాలతో అర్చిస్తే బ్రహ్మలోకాన్ని పరమపదం లభిస్తుందని గాఢంగా విశ్వసిస్తారు. 

శ్రావణమాసంలో గన్నేరుపూలతో శివునిని పూజించినవారికి వేయిగోదానముల ఫలం లభిస్తుంది. 

భాద్రపద మాసంలో శివునిని ఉత్తరేణి పూలతో పూజించిన వారు హంసధ్వజంతో కూడిన విమానంలో పుణ్యపదానికి చేరుకుంటారు. 

ఆశ్వయుజమాసంలో పరమశివునిని జిల్లేడుపూలతో పూజించినవారు మయూర ధ్వజంతో కూడిన విమానంలో దివ్యపదాన్ని చేరుతారు. 

కార్తీకమాసంలో శివునిని పాలతో అభిషేకించి జాజిపూలతో పూజించినవారు శివపదాన్ని దర్శించుకుంటారు. 

మార్గశిర మాసంలో శివునిని పొగడపూలతో పూజించినవారు, ముల్లోకాలను దాటి తామున్నచోటికే తిరిగిరాగలరు. 

పుష్యమాసంలో శివునిని ఉమ్మెత్త పూలతో పూజించినవారు పరమ పదాన్ని పొందగలరు. 

మాఘ మాసంలో పరమేశ్వరుడిని బిల్వదళాలతో అర్చించినవారు, లేత సూర్యుడు, చంద్రుడులున్న విమానంలో పరమపదానికి వెళతారు. 

ఫాల్గుణమాసంలో శివునిని సుగంధజలంతో అభిషేకించి తుమ్మిపూలతో పూజించినవారికి ఇంద్రుని సింహాసనంలో అర్ధభాగం దక్కుతుంది.