‘బాబోయ్.. ఇకనుంచి అలాంటివి చేయను’

Posted: 08/07/2015 04:00 PM IST

తెలుగు ఇండస్ట్రీలో గొప్ప హాస్యనటుడిగా పేరుగాంచిన రాజేంద్రప్రసాద్ తరువాత ఆ స్థానాన్ని ఆక్రమించుకున్న నటుడిగా అల్లరి నరేష్ పేరుగాంచాడు. ఎందుకంటే.. ‘అల్లరి’తో టాలవుడ్ ఎంట్రీ ఇచ్చిన ఈ హీరో నటించిన అన్ని సినిమాలు దాదాపుగా హిట్ అయ్యాయి. దీంతో.. ఈ హీరోతో సినిమాలు తీస్తే మినిమ్ గ్యారెంటీ వుంటుందన్న నమ్మకాన్ని దర్శకనిర్మాతలు వెల్లడిస్తుంటారు. అలా తన నటనాప్రతిభతో, కామెడీ టైమింగ్ తో ప్రేక్షకులతోపాటు దర్శకనిర్మాతల్ని ఈ హీరో తన బుట్టలో పడేసుకున్నాడు.

కానీ.. ఆమధ్య ఈ హీరోకి వరుస పరాజయాలను చవిచూడలేక తప్పలేదు. గతకొన్నాళ్ల నుంచి ఇండస్ట్రీలో ప్రతిఒక్కరు ప్రయోగాత్మక సినిమాలనే తీస్తుండటంతో.. అల్లరి నరేష్ కూడా ఆ తరహా చిత్రాలతోనే ప్రేక్షకుల ముందుకొచ్చాడు. తన కామెడీతోపాటు ప్రేక్షకుల్ని కొత్తదనం చూపించడానికి ప్రయత్నాలు చేశాడు. అయితే.. ఆ ప్రయత్నాలు ఫలించక నరేష్ తన కెరీర్ కాస్త ఇరుకున పెట్టేసుకున్నాడు. అయినప్పటికీ తన ప్రయత్నాన్ని ఆపకుండా వరుసగా సినిమాలు చేసుకుంటూ వచ్చాడు. అవన్నీ బాక్సాఫీస్ దగ్గర బోర్లపడ్డాయే తప్ప.. నరేష్ కి ఏమాత్రం ఫలితాన్ని అందించలేదు. దీంతో.. ఈ హీరో కొత్తదనం కోసం తాను చేసిన ప్రయత్నాలు ఫలించడం లేదనే విషయాన్ని కాస్త ఆలస్యంగా అర్థం చేసుకున్నాడు.

ప్రేక్షకులు తనని ఎప్పటిలాగే చూడటానికే ఇష్టపడుతున్నారని గ్రహించిన నరేష్.. ఆ పాత రూట్లోకే వెళ్లి ‘జేమ్స్ బాండ్’ చిత్రంలో నటించాడు. ఆ సినిమా ఆశించిన విధంగానే మంచి విజయం సాధించడంతోపాటు నిర్మాతలకు కాసుల వర్షం కురిపించింది. ఇక చాలాకాలం నుంచి సక్సెస్ కోసం వేచిచూసిన తనకు ఈ చిత్రం ఆనందాన్ని ఇచ్చిందని నరేష్ హర్షం వ్యక్తం చేశాడు. అలాగే.. ఇకపై తాను ప్రయోగాల జోలికి వెళ్లకుండా.. ప్రేక్షకులకు నచ్చే అల్లరి సినిమాలే చేస్తానని అంటున్నాడు.

AS