క్రేజీ కాంబినేషన్ చిత్రానికి గిబ్రాన్ బ్యాండ్ బాజా

Posted: 11/20/2015 04:41 PM IST

Music director ghibran to compose songs to venkatesh maruthi combination movie

ప్రస్తుతరోజుల్లో ప్రేక్షకులు సినిమాల్లో కొత్తదనాన్ని కోరుకుంటున్నారు. కేవలం కథ మాత్రమే కాదు.. మ్యూజిక్ లో కొత్త బీట్స్ కావాలంటూ డిమాండ్ చేస్తున్నారు. అవే డప్పులు, అదే పాత స్టైల్లో వుండే పాటలు కాకుండా.. నేటి జనరేషన్ కి తగ్గట్టుగా ఉర్రూతలూగించే సాంగ్స్ కే ఓటేస్తున్నారు. ఈ విషయాన్ని పసిగట్టిన కొంతమంది మ్యూజిక్ డైరెక్టర్లు.. ఆ తరహాలో పాటలు అందించేందుకే ప్రయత్నాలు చేస్తున్నారు. అలాంటివారిలో మ్యూజిక్ డైరెక్టర్ మహ్మద్ గిబ్రాన్ ఒకరు. ఇప్పటివరకు ఈయన అందించిన పాటలు ఇతర సినిమా పాటలతో చాలా డిఫరెంట్ స్టైల్లో వుండటంతో.. కేవలం నాలుగైదు సినిమాలకే స్టార్ స్టేటస్ కి కైవసం చేసుకున్నాడు. అందుకే.. ఇతని కోసం దక్షిణాది దర్శకనిర్మాతలు పరుగులు పెడుతున్నారు. ఈ నేపథ్యంలో ఇతనికి ఓ క్రేజీ కాంబినేషన్ లో రూపొందుతున్న సినిమాకి మ్యూజిక్ అందించే అవకాశం వరించింది.

నిన్నటిదాకా బూతు సినిమాల దర్శకుడిగా పేరుగాంచిన డైరెక్టర్ మారుతి.. ‘భలే భలే మగాడివోయ్’ సినిమాతో ఆ ఇమేజ్ ని నుంచి బయటపడ్డాడు. అంతేకాదు.. ఆచిత్రం భారీ విజయం సాధించడంతో స్టార్ స్టేటస్‌ను కొట్టేశాడు. ఆ స్టేటస్ ని కంటన్యూ చేయడం కోసమే మారుతి.. ఇప్పుడు విక్టరీ వెంకటేష్‌తో ఓ సినిమాను తెరకెక్కించేందుకు సిద్ధమయ్యాడు. నిజానికి.. వీరిద్దరి కాంబినేషన్లో చాలాకాలం క్రితమే ఒక సినిమా మొదలైనా, చివరి నిమిషంలో ఆ ప్రాజెక్టు ఆగిపోయింది. అయితే.. వెంకీకి మంచి హిట్ దక్కకపోవడం, మారుతి భారీ విజయం సాధించి స్టార్ స్టేటస్ కైవసం చేసుకోవడంతో వీరిద్దరూ మళ్ళీ కలిశారు. దీంతో.. ఈ సినిమా ఆసక్తికరంగా మారింది. ఇప్పటికే ఈ చిత్రానికి సంబంధించి ప్రీ-ప్రొడక్షన్ పనులు చాలా వేగంగా జరుగుతున్నాయని సమాచారం. ‘తులసి’ తర్వాత మళ్ళీ వెంకీ సరసన నయనతార హీరోయిన్‌గా నటించనున్న ఈ సినిమా డిసెంబర్ నెలలో సెట్స్‌పైకి వెళ్ళనుంది.

ఇక ఈ సినిమాకు సంబంధించిన మరో ఆసక్తికర విషయం ఏమిటంటే.. ఈ చిత్రానికి తెలుగు, తమిళ భాషల్లో లేటెస్ట్ మ్యూజిక్ సెన్సేషన్ అయిన గిబ్రాన్ సంగీతం సమకూర్చనున్నాడు. ఇప్పటికే రన్ రాజా రన్, జిల్, ఉత్తమ విలన్, చీకటి రాజ్యం తదితర సినిమాల్లో తనదైన మ్యూజిక్ మ్యాజిక్ చేసి లేటెస్ట్ సెన్సేషన్‌గా నిలిచిన గిబ్రాన్.. వెంకీ-మారుతిల సినిమాకు పనిచేయనుండడం విశేషంగా చెప్పుకోవచ్చు. ఇక గిబ్రాన్ వెరైటీ ట్యూన్స్ కి పెట్టింది పేరు కాబట్టి.. ఈ సినిమాకి అతను ఎలాంటి సాంగ్స్ అందిస్తాడోనని ఆసక్తి నెలకొంది. సితార క్రియేషన్స్‌తో కలిపి సురేష్ బాబు సంయుక్తంగా నిర్మిస్తోన్న ఈ సినిమా డిసెంబర్ 16వ తేదీన మొదటి షెడ్యూల్ మొదలుపెట్టనుంది.