సుధీర్ బాబుకు కలిసొచ్చిన ‘భలే మంచి రోజు’

Posted: 07/30/2015 01:45 PM IST

Sudheer babu bhale manchi roju movie sriram aditya director tollywood

సూపర్ స్టార్ కృష్ణ కుటుంబం నుంచి వెండితెరకు పరిచయమైన యంగ్ హీరో సుధీర్ బాబు వైవిధ్యభరితమైన సినిమాలతో దూసుకుపోతున్నాడు. ‘ప్రేమకథా చిత్రం’తో నటుడిగా మంచి మార్కులు కొట్టేసిన ఈ హీరో.. ఆ తరహాలోనే వెరైటీ ప్రేమకథాచిత్రాలను ఎంచుకుంటూ సక్సెస్ ఫుల్ గా కొనసాగుతున్నాడు. ఇతర యువకథానాయకులతో పోటీపడుతూ.. గ్యాప్ లేకుండా వరుస సినిమాలు చేసేస్తున్నాడు. తాను నటించే సినిమాల్లో కొత్తదనం వుండేలా జాగ్రత్తపడుతూనే, ఆడియెన్స్ తననుంచి ఏం కోరుకుంటున్నారో దానిని ప్రదర్శిస్తూ ఆదరణ పొందుతున్నాడు. ఇప్పుడు ఈ హీరోకి ‘భలే మంచి రోజు’ రావడంతో.. సంతోషంతో పొంగిపోతున్నాడు.

ఇటీవలే ‘కృష్ణమ్మ కలిపింది ఇద్దరిని’ వంటి లవ్ సినిమాతో డీసెంట్ హిట్ కొట్టిన సుధీర్.. ‘భలే మంచి రోజు’ సినిమాతో త్వరలోనే ఆడియెన్స్ ముందుకు రానున్నాడు. శ్రీరామ్ ఆదిత్య దర్శకుడిగా వ్యవహరిస్తున్న ఈ సినిమా షూటింగ్ దాదాపు చివరిదశకు చేరుకుందని సమాచారం. ఇక ఈ సినిమాకి నిర్మాతలుగా వ్యవహరిస్తున్న శశి-వంశీ మాట్లాడుతూ.. ‘టైటిల్ కి తగ్గట్టుగానే కథ ఎంతో హాయిగా, ఆహ్లాదకరంగా సాగిపోతుంద’న్నారు. శరవేగంగా షూటింగ్ జరుపుకుంటున్న ఈ చిత్రాన్ని సెప్టెంబర్ లో విడుదల చేసేందుకు దర్శకనిర్మాతలు సన్నాహాలు చేస్తున్నారు. అటు ఈ సినిమా మంచి విజయం సాధిస్తుందని సుధీర్ భాబు ఆశాభావం వ్యక్తం చేస్తున్నాడు.

ఇదివరకు నటించిన సినిమాలకంటే ఈ చిత్రంలో సుధీర్ సరికొత్త తరహాలో కనిపించనున్నాడని యూనిట్ వర్గాలు తెలుపుతున్నాయి. ఫుల్ కామెడీ ఎంటర్టైనర్ తో సాగే ఈ చిత్రం కథ చాలా డిఫరెంట్ గా వుందని అంటున్నారు. ఆడియెన్స్ ఈ చిత్రం తప్పకుండా నచ్చుతుందని, సుధీర్ కెరీర్ లో మంచి విజయం సాధించిన చిత్రంగా ఇది నిలిచిపోనుందని ఆశాభావం వ్యక్తం చేస్తున్నారు. మరి.. ఈ సినిమా సుధీర్ కి ఎటువంటి విజయాన్ని అందివ్వనుందో తెలియాలంటే రిలీజ్ వరకు ఆగాల్సిందే!