రాహుల్ రవీంద్రన్

Posted: 03/05/2015 04:03 PM IST

‘అందాల రాక్షసి’ సినిమాతో మంచి గుర్తింపు పొందిన నటుడు రాహుల్ రవీంద్రన్.. ఇటీవలే ‘అలా ఎలా’ చిత్రంతో మంచి విజయం సాధించాడు. అంతేకాదు.. ఓవైపు హీరోగా నటిస్తూనే.. మరోవైపు మంచి ఆఫర్లు వస్తే స్పెషల్ క్యారెక్టర్లు పోషించడానికి కూడా రెడీ అవుతున్నాడు. ఇప్పటికే ఈ హీరో సందీప్ కిషన్ నటిస్తున్న ‘టైగర్’ సినిమాలో ఓ ప్రత్యేక పాత్రలో నటిస్తుండగా.. ఇప్పుడు ఏకంగా మహేష్ బాబు నటిస్తున్న మూవీలో ఓ ముఖ్యపాత్ర పోషించేందుకు గ్రీన్ సిగ్నల్ ఇచ్చాడు.

మహేష్ బాబు హీరోగా కొరటాల శివ దర్శకత్వంలో ‘శ్రీమంతుడు’ పేరిట ఓ చిత్రం రూపొందుతున్న విషయం తెలిసిందే! ఈ మూవీలోనే రాహుల్ ఓ కీలకపాత్ర పోషించనున్నాడు. ఈ విషయాన్ని స్వయంగా చిత్రదర్శకుడు కొరటాల శివ ట్విటర్ ద్వారా వెల్లడించాడు. ‘ఈ సినిమాలో రాహుల్ ఓ కీలకమైన పాత్రను చేయడానికి అంగీకరించినందుకు థ్యాంక్స్’ అంటూ ఆయన ట్వీట్ చేశాడు. ఇక ఈ మూవీలో మహేష్ సరసన శృతిహాసన్ మొదటిసారిగా నటిస్తున్న విషయం విదితమే!