ఈ బ్యాచిలర్ హీరో ‘గ్రీన్ సిగ్నల్’ ఎవరికి ఇస్తాడో?

Posted: 02/02/2015 03:57 PM IST

Prabhas tollywood bachelor hero next movie project issue bahubali

దర్శకధీరుడు రాజమౌళి తెరకెక్కిస్తున్న ‘బాహుబలి’ చిత్రంలో ప్రభాస్ టైటిల్ రోల్’లో నటిస్తున్న విషయం తెలిసిందే! దాదాపు ఏడాదికిపైగా షూటింగ్ జరుపుకున్న ఈ మూవీ.. ఇటీవలే చిత్రీకరణ పూర్తి చేసుకుంది. ప్రస్తుతం పోస్ట్ ప్రొడక్షన్ పనులు జరుగుతున్నాయి. ఇదిలావుండగా.. ఈ చిత్రం షూటింగ్ పూర్తైన నేపథ్యంలో ప్రభాస్ ఇప్పుడు ఫ్రీగా వున్నాడు. దీంతో ప్రభాస్ తన తదుపరి చిత్రం ఎవరితో కమిట్ అవుతాడో..? ఇప్పుడిదే టాలీవుడ్’లో ఆసక్తికరంగా మారింది.

నిజానికి ‘బాహుబలి’ చిత్రం షూటింగ్ మొదటినాళ్లలో వుండగానే ప్రభాస్ కొందరికి కమిట్ అయ్యాడు. ఈ నేపథ్యంలోనే ఇప్పుడు పూరీజగన్నాథ్ ఈ హీరోతో మూవీ తీసేందుకు రెడీ అవుతున్నాడు. మరోవైపు ‘మిర్చీ’లాంటి సూపర్ హిట్ చిత్రాన్ని ప్రభాస్’కి అందించిన యూవీ క్రియేషన్స్ కూడా ఇతనితో మూవీ చేసేందుకు సిద్ధంగా వుంది. ఇక ఈ హీరో పెద్దనాన్న కృష్ణరాజు కూడా ఇతనితో కలిసి ‘ఒక్క అడుగు’ అనే చిత్రాన్ని చేస్తున్నట్లు ఆమధ్య ప్రకటించారు. ఆ చిత్రానికి తనే దర్శకత్వం వహిస్తానని ఆయన వెల్లడించారు కూడా!

ఇలా ఒకేసారి మూడు ప్రాజెక్టులు ప్రభాస్ కోసం ఎంతగానో వెయిట్ చేస్తున్నాయి. వీటితోపాటు కొందరు కొత్త దర్వకులు కూడా ప్రభాస్ కోసం పవర్ ఫుల్ స్ర్కిప్టులు రెడీ చేసుకుని పెట్టుకున్నారట! మరి.. వీటన్నింటిలో ప్రభాస్ ఏ చిత్రానికి గ్రీన్ సిగ్నల్ ఇవ్వనున్నాడోననే వార్త ఆసక్తికరంగా మారింది.