విష్ణు కమలాల నోము

Posted: 04/10/2014 12:34 PM IST

కథ :

పూర్వం ఒక రాజు కూతురు, ఒక మంత్రి కూతురు చాలా అన్యోన్యంగా వుండేవారు. ఈ ఇద్దరు అమ్మాయిలు చిన్నప్పటినుంచి కలిసి, ఆడుతూపాడుతూ పెద్దవారయిపోతారు. అయితే మంత్రిగారి కూతురు ఎంతో అందంగా, నిగనిగలాడే చర్మంతో ఎంతో ప్రకాశవంతంగా కనిపించేది. 

రాజు కూతురు మాత్రం సాదాసీనంగా వుండేది. మంత్రి కూతురు అందంగా వుండటం చూసి రాజు కూతురు ఎంతో బెంగగాను, బాధపడుతూ వుండేది. తను కూడా అంత అందంగా లేదనే మనోవేదన తీవ్రంగా వెంటాడేది. 

ఒకరోజు రాజు కూతురు తన మనసులోని భావాలను ఒక బ్రాహ్మణ ముత్తయిదువుతో పంచుకుంటుంది. తను అందంగా లేనని బాధపడుతూ చెబుతుంది. దీంతో ఆ బ్రాహ్మణ గృహిణి.. ‘‘రాజకుమారీ గారూ! దీని గురించి ఇంతగా దిగులుపడవలసిన అవసరం లేదు. స్త్రీలు లక్ష్మీ వంటి అందాలను పొందడానికి శ్రీ మహావిష్ణువు ఒక వ్రతాన్ని చెప్పాడు. ‘‘విష్ణు కమలాల నోము’’ను నోచుకుంటే.. నీ ముఖం కూడా లక్ష్మీలా కళాకాంతులుగా మారిపోతుంది’’ అని సలహా ఇస్తుంది. 

దీంతో ఆ రాజు కూతురు, బ్రాహ్మణ గృహిణి చెప్పిన విధంగా విష్ణుకమలాల నోమును నిర్వహించుకుంటుంది. తరువాత ఉద్యాపన చేసుకోగా.. ఆమె ముఖం కూడా లక్ష్మీ కళతో ప్రకాశించింది. 

విధానం : 

విష్ణు కమలాల నోమును నోచుకోవడం చాలా సులభం. ప్రతిరోజూ ఒక కమలవత్తిని తీసుకుని, దానిని ఆవునేతితో వెలిగించాలి. లక్ష్మీనారాయణులను పూజించుకుని పైన చెప్పిన కథను గుర్తించుకోవాలి. తరువాత అక్షితలు వేసుకోవాలి. ఈ విధంగా పూర్తి చేసుకున్న తరువాత ఉద్యాపనం చేసుకోవాలి. 

ఉద్యాపనం :

నోమును నిర్వహించుకున్న సంవత్సరాంతంలో.. ఒక వెండి ప్రమిదునూ, ఒక బంగారు ప్రమిదునూ చేయించుకోవాలి. ఆ రెండింటిని ఆవుల నేతితో వెలిగించిన కమలవత్తినీ చెరొకటిగా తీసుకోవాలి. లక్ష్మీనారాయణులను పూజించుకున్న తరువాత ఒక మానెడు బియ్యం, కొత్త వస్త్రాలు, దక్షిత తాంబూలాలతో సహా.. వెలుగుతున్న వెండీ, బంగారు ప్రమిదుల దీపాలను వాయన, దానమివ్వాలి.