మిత్రులుగా విడిపోయే అవకాశం ఉండేది : కావూరి

Posted: 12/07/2013 08:30 PM IST

రాష్ట్రం సమైక్యంగా ఉండాలనేదే తన కోరిక అని, అనివార్య కారణాల వల్ల సీమాంద్రుల హక్కుల గురించి అడుగుతున్నామని కేంద్ర మంత్రి కావూరి సాంబశివరావు అన్నారు. విభజన అంశాన్ని కేబినేట్‌లో టేబుల్ ఐటమ్‌గా తీసుకురావడం న్యాయం కాదని కేంద్ర మంత్రి కావూరి అన్నారు. విభజన నిర్ణయాన్ని కేబినెట్‌లో తీవ్రంగా వ్యతిరేకించామని, విభజన వల్ల వచ్చే నష్టాలను వివరించామని అయితే తమ వాదనలు కేంద్రం పట్టించుకోలేదని వాపోయారు.బిల్లులోని అంశాలను చదువుకునే అవకాశం కూడా ఇవ్వలేదన్నారు.

 

ఒక ప్రాంతానికి న్యాయం...మరో ప్రాంతానికి అన్యాయం చేయొద్దని కేబినెట్ చెప్పామని అయినా సీమాంధ్రకు అన్యాయం చేశారని ఆయన ఆరోపించారు. ఇరుప్రాంతాలకు న్యాయం చేస్తే మిత్రులుగా విడిపోయే అవకాశముందని అభిప్రాయపడ్డారు. విభజన తథ్యం అని జోవోఎం తమకు చెప్పిందని, రాష్ట్రంలోని అన్ని పార్టీలు ఒప్పుకున్నాయి కాబట్టే విభజన నిర్ణయానికి వచ్చారని తెలిపారు. తెలంగాణ వనరులను ఎవరూ దోచుకోలేదన్నారు. హైదరాబాద్ అభివృద్ధిలో అన్ని ప్రాంతాల వారి కృషి ఉందన్నారు. తమిళనాడులో చాలా ప్రాంతాలను అభివృద్ధి చేశారని, మన రాష్ట్రంలో హైదరాబాద్‌ను మాత్రమే అభివృద్ధి చేశారని కావూరి తెలిపారు.

 

కోస్తాకు అవసరమైన నేషనల్ ఫిషరీస్ కార్పొరేషన్, సునామీ కేంద్రాన్ని హైదరాబాద్‌లోనే పెట్టారు. చదువు పూర్తికాగానే ప్రతి ఒక్కరు హైదరాబాద్ వైపు చూస్తున్నారని వెల్లడించారు. సీమాంధ్ర అభివృద్ధి చెందే వరకు పదేళ్లపాటు హైదరాబాద్‌ను యూటీ చేయాలని కోరినట్లు కావూరి తెలిపారు. పోలవరానికి తెలంగాణవారు అడ్డుపడుతున్నందున భద్రచలాన్ని సీమాంధ్రలో కలపాలన్నారు. పోలవరం ప్రాజెక్టు నిర్మాణం కావాలంటే భద్రాచలం సీమాంధ్రలోనే ఉండాలని కేంద్రాన్ని కోరామన్నారు. భద్రాచలాన్ని తెలంగాణకు ఇస్తే శబరి నుంచి వచ్చే నీటిని అడ్డుకునే ప్రమాదముందన్నారు. శబరి నీటిని అడ్డుకుంటే ధవళేశ్వరం ఆయకట్టుకు తీవ్ర నష్టం కలుగుతుందని కావూరి పేర్కొన్నారు.