గండిపేటలో చంద్రబాబు విక్టరీ మైనపు బొమ్మ?

Posted: 05/27/2013 08:13 PM IST

గండిపేటలోని తెలుగు విజయం ప్రాంగణంలో తెలుగుదేశం పార్టీ మహానాడు ప్రారంభమైంది. పార్టీ అధినేత చంద్రబాబు నాయుడు జెండాను ఆవిష్కరించి మహానాడును ప్రారంభించారు. అంతకుముందు ప్రాంగణంలోని చిత్తూరు జిల్లా సభ్యత్వ నమోదు కేంద్రంలో చంద్రబాబు సంతకం చేశారు. తెలుగుదేశం పార్టీ మహానాడు ప్రాంగణంలో నారా చంద్రబాబు నాయుడి మైనపు బొమ్మను నెలకొల్పారు. సరిగ్గా చంద్రబాబు కూర్చున్నట్లుగానే ఉన్న ఆ ప్రతిమను గుంటూరు జిల్లా తెనాలికి చెందిన దీవీ శ్రీనివాసనాయుడు చంద్రబాబుకు బహూకరించారు.

ఈ ప్రతిమకు చంద్రబాబు దుస్తులనే తొడిగారు. గుంటూరు జిల్లా తెనాలికి చెందిన అక్కల శ్రీరాం దీన్ని రూపొందించారు. విక్టరీ చూపిస్తూ చంద్రబాబు మైనపు బొమ్మ ఉండటంతో అభిమానులు, కార్యకర్తలు, నాయకుల్లో కొత్త ఉత్సహం కనిపించింది. ఇదిలావుంటే, మహానాడులో చంద్రబాబు నాయుడికి కార్యకర్తలు అపురూపమైన కానుకలు అందజేశారు.

హైదరాబాదులోని ముషీరాబాద్‌కు చెందిన మత్స్యకారుడు శివప్రసాద్ బుల్లి సైకిల్‌ను చంద్రబాబుకు బహుమానంగా అందించాడు. ఇందులో చేపల బొమ్మలు కూడా ఉన్నాయి. బాబు అధ్యక్షుడిగా నామినేషన్లు తెలుగుదేశం పార్టీ అధ్యక్షుడిగా చంద్రబాబు నాయుడి పేరును ప్రతిపాదిస్తూ 24 సెట్ల నామినేషన్లు దాఖలైనట్లు పార్టీ నేత కెఇ కృష్ణమూర్తి చెప్పారు. మంగళవారం సాయంత్రం ఐదు గంటలకు పార్టీ అధ్యక్షుడి పేరును అధికారికంగా ప్రకటిస్తామని ఆయన చెప్పారు.