మణికొండలో ఉద్రిక్తత..

Posted: 04/26/2013 03:24 PM IST

నగర శివారులోని మణికొండ పంచవటి కాలనీలో తీవ్ర ఉద్రిక్త పరిస్థితులు నెలకొన్నాయి. ఈ కాలనీలో అక్రమ నిర్మాణాలు చేపట్టారంటూ, వాటిని కూల్చేందుకు జీహెచ్ఎంసీ అధికారులు సిద్ధమయ్యారు. ఈ చర్యను స్థానికులు అడ్డుకోవడంతో పరిస్థితి ఉద్రిక్తంగా మారింది. పంచవటి కాలనీలో నిబంధనలకు విరుద్ధంగా ఇళ్ల నిర్మాణం చేపట్టారంటూ ఓ పిటిషన్ దాఖలైంది. దీనిపై విచారించిన లోకాయుక్త.. అక్రమ నిర్మాణాలపై చర్య తీసుకోవాలని జీహెచ్ఎంసీని ఆదేశించింది. దీంతో రంగంలోకి దిగిన జీహెచ్ఎంసీ అధికారులు.. పంచవటి కాలనీలో మొత్తం 64 అక్రమ నిర్మాణాలు ఉన్నాయని గుర్తించారు. వీటిలో ఏడు నిర్మాణాలను ఈ రోజు కూల్చేందుకు పోలీసులతో జీహెఎంసీ అధికారులు పంచవటి కాలనీకి చేరుకున్నారు. ఈ చర్యను స్థానికులు అడ్డుకోవడంతో ఇరు వర్గాల మధ్య వాగ్వివాదం చోటు చేసుకుంది. దీనిపై అధికారులు స్పందిస్తూ లోకాయుక్త ఆదేశాల మేరకే తాము ఆక్రమణలను కూల్చేస్తున్నట్లు చెప్తున్నారు. ఆక్రమణలన్నీ దశలవారీగా తొలగిస్తామని చెబుతున్నారు. ఈ విషయమై ఆందోళన చేపట్టేందుకు స్థానికులు, రాజకీయ పార్టీలు సిద్ధమవుతున్నాయి.