Posted: 08/30/2012 01:26 PM IST

మెట్రోరైలు ప్రాజెక్ట్‌లను స్వయంగా చేపట్టకపోయినా 'ఎల్అండ్‌టీ'కి ఈ ప్రాజెక్టుల నిర్మాణంలో విశేష అనుభవం ఉంది. ఢిల్లీ, బెంగళూరు, చెన్నై, ముంబై మెట్రోరైళ్ల ప్రాజెక్ట్ పనుల్లో దీని భాగస్వామ్యం చాలా కీలకం. అటువంటిది హైదరాబాద్ మెట్రోరైలు ప్రాజెక్ట్‌ను స్వయంగా దక్కించుకున్న ఎల్అండ్‌టీ ఈ ప్రాజెక్టును అత్యంత ప్రతిష్ఠాత్మకంగా తీసుకుంది. భూముల అప్పగింతలో జాప్యం జరిగినా.. ప్రాజెక్టుకు న్యాయపరమైన చిక్కులు ఎదురైనా వెనుకడుగు వేయకుండా తమ పని తాము చేసుకుంటూ ముందుకు దూసుకుపోతున్నారు.ఇప్పటి వరకు రెండు ప్రధాన కారిడార్లలో భూ పరీక్షలకే పరిమితమైన సంస్థ ప్రాజెక్టు పనులను వేగవంతం చేయనుంది.

చెన్నై, బెంగళూరు మెట్రో నగరాల ప్రాజెక్టుల్లో పని చేసిన అనుభవం ఉన్న ఇంజనీర్లను నగరానికి రప్పిస్తోంది. మియాపూర్ డిపో పనులకు శ్రీకారం చుట్టిన ఎల్అండ్‌టీ నిపుణులైన 200 మంది ఇంజనీర్లను అక్కడ వినియోగిస్తోంది.మూడు మాసాల క్రితం ఉప్పల్ కాస్టింగ్ యార్డు, ఉప్పల్ డిపోల్లోనూ పనులను ప్రారంభించిన సదరు సంస్థ అక్కడ పనుల వేగాన్ని పెంచింది. నాగోల్ నుంచి మెట్టుగూడ కారిడార్‌లో 60కి పైగా పిల్లర్ల నిర్మాణాన్ని పూర్తి చేసింది. మరోవైపు రెడీమేడ్ సెగ్మెంట్ల తయారీ పనులు వేగంగా జరుగుతున్నాయి. పిల్లర్ల నిర్మాణం కోసం 120 పునాదులను అదనంగా సిద్ధ్దం చేసింది.

ప్రాజెక్టు కీలక దశకు చేరుకోవడంతో నైపుణ్యం ఉన్న కార్మికులను సైతం రంగంలోకి దించడానికి ఏర్పాట్లు చేస్తోంది.శిక్షణ - ఉపాధిమెట్రో ప్రాజెక్టుకు సాంకేతిక అంశాలు కీలకం కావడంతో కార్మికులకు ఎల్అండ్‌టీ ముందుగా శిక్షణ ఇస్తోంది. వృత్తి నైపుణ్యాన్ని ఒక పక్క పెంచుతూ మరో పక్క వారికి ఉపాధి కల్పిస్తోంది. ప్రాజెక్టు పనుల్లో లోపాలు ఉండకూడదనే లక్ష్యం మేరకే శిక్షణ తరగతులు నిర్వహిస్తున్నట్లు ఆ సంస్థ ఎండీ వీబీ గాడ్గిల్ తెలిపారు. జడ్చర్ల, ఉప్పల్ కాస్టింగ్ యార్డుల్లో కార్మికులకు శిక్షణ తరగతులు నిర్వహిస్తున్నారు..