బాహుబలి ఆడియో విడుదలకు ఏర్పాట్లు

Posted: 05/12/2015 01:36 PM IST

ఎస్.ఎస్.రాజమౌళి దర్శకత్వంలో ప్రభాస్, అనుష్క, తమన్నా, రానా ప్రధాన పాత్రలలో నటిస్తున్న తాజా చిత్రం ‘బాహుబలి’. ఈ చిత్రానికి ఎం.ఎం.కీరవాణి సంగీతం అందిస్తున్నాడు. రాజమౌళి దర్శకత్వంలో వచ్చిన అన్ని చిత్రాలకు కీరవాణి సంగీతం అందించారు. అయితే భవిష్యత్తులో రాజమౌళి సినిమాలకు ఎవరు సంగీతం అందించనున్నారో ప్రస్తుతం పెద్ద సమస్యగా మారింది.

ఎందుకంటే కీరవాణి 2016లో సంగీత దర్శకుడిగా రిటైర్మెంట్ తీసుకోబోతున్నట్లుగా గతంలో ప్రకటించిన విషయం తెలిసిందే. కాబట్టి.. కీరవాణి సంగీత దర్శకత్వంలో రాబోతున్న చివరి చిత్రం ‘బాహుబలి’ చిత్రమే అవుతుందేమోనని అందరూ ఎంతో ఫీల్ అవుతున్నారు. అయితే ఈ సంధర్భంగా కీరవాణికి భారీగా వీడ్కోలు పలకాలని ‘బాహుబలి’ చిత్ర యూనిట్ భావిస్తున్నట్లుగా తెలిసింది.

అందుకే ‘బాహుబలి’ ఆడియో విడుదల కార్యక్రమంలో కీరవాణిని ఘనంగా సన్మానించడానికి చిత్ర యూనిట్ ఏర్పాట్లు చేస్తున్నట్లుగా సమాచారం. ‘బాహుబలి’ ఆడియో వేడుకను ఈనెల 31న హైదరాబాద్ లో భారీ ఎత్తున నిర్వహించడానికి చిత్ర యూనిట్ నిర్ణయించినట్లుగా తెలిసింది. అదే రోజున థియేటర్ ట్రైలర్ ను కూడా విడుదల చేయనున్నారు.

భారీ బడ్జెట్ తో ఆర్కా మీడియా బ్యానర్లో ప్రతిష్టాత్మకంగా రూపొందుతున్న ఈ చిత్రాన్ని జులై 10న తెలుగు, తమిళ, హిందీ భాషలలో ప్రపంచ వ్యాప్తంగా భారీ ఎత్తున విడుదల చేయనున్నారు. ఇప్పటికే విడుదలైన మేకింగ్ వీడియోలు, పోస్టర్లు భారీ సంచలనం సృష్టిస్తున్నాయి. రోజురోజుకి ఈ సినిమా అంచనాలు తారాస్థాయికి చేరుతున్నాయి. ఈ ఆడియో విడుదల కార్యక్రమం గురించి త్వరలోనే అన్ని వివరాలు చిత్ర యూనిట్ అధికారికంగా ప్రకటించనున్నారు.