పవర్ స్టార్ గబ్బర్ సింగ్2 కు డేట్ ఫిక్స్

Posted: 05/12/2015 11:28 AM IST

‘గబ్బర్ సింగ్2’ ఎంట్రీకి టైమొచ్చింది. పవర్ స్టార్ పవన్ కళ్యాణ్ అభిమానులు ఎంతగానో ఎదురుచూస్తున్న సమయం దగ్గరపడినట్లుగా తెలిసింది. పవన్ కళ్యాణ్ చేయబోయే ‘గబ్బర్ సింగ్2’ త్వరలోనే ప్రారంభం కానుందని గతకొద్ది కాలంగా వార్తలొస్తున్న విషయం తెలిసిందే. దీంతో అభిమానులు ఈ సినిమా ఎప్పుడు ప్రారంభమవుతుందా అని ఎంతో ఆతృతగా ఎదురుచూస్తున్నారు.

తాజా సమాచారం ప్రకారం ఈ ప్రాజెక్టు ఈనెల 29న సెట్స్ పైకి వెళ్లనుందని తెలిసింది. మే 29 నుంచి రెగ్యులర్ షూటింగ్ ప్రారంభం కానున్నట్లుగా టాలీవుడ్ సినీవర్గాల సమాచారం. నిరవధికంగా షూటింగ్ జరిపి, వచ్చే ఏడాది సంక్రాంతికి సినిమాను విడుదల చేయాలని ప్లాన్ చేస్తున్నట్లుగా తెలిసింది. త్వరలోనే ఈ విషయాన్ని అధికారికంగా ప్రకటించనున్నారు.

‘పవర్’ సినిమాతో కమర్షియల్ మాస్ దర్శకుడిగా పేరు దక్కించుకున్న బాబీ... ఈ ‘గబ్బర్ సింగ్2’ చిత్రానికి దర్శకత్వం వహిస్తున్నాడు. నార్త్ స్టార్ బ్యానర్ పై ప్రముఖ నిర్మాత శరత్ మరార్ ఈ చిత్రాన్ని నిర్మిస్తున్నారు. పవన్ సరసన అనీషా అంబ్రోస్ మొదటి హీరోయిన్ గా ఖరారు అయ్యింది. త్వరలోనే రెండవ హీరోయిన్ ను ఫైనలైజ్ చేయనున్నారు.

దేవిశ్రీప్రసాద్ సంగీతం అందిస్తున్నారు. ఇప్పటికే ఈ చిత్రం కోసం దేవి మ్యూజిక్ సిట్టింగ్స్ ప్రారంభించేసాడు. ‘గబ్బర్ సింగ్’ చిత్రం కంటే డబుల్ పవర్ తో ‘గబ్బర్ సింగ్2’ ఆడియో ఇవ్వడానికి దేవి ప్రయత్నిస్తున్నాడు. ప్రీ ప్రొడక్షన్ పనులు దాదాపు పూర్తయ్యాయని తెలిసింది. మరికొద్ది రోజుల్లో అన్ని వివరాలు తెలియనున్నాయి.

video courtesy: SriBalajiMovies