Posted: 02/15/2012 07:00 PM IST

ఫలానా పాత్రల్లోనే నటించాలనే నిబంధన ఏమీ పెట్టుకోలేదు. మహారాణి పాత్రలోనైనా సరే, నిరుపేద పాత్రలోనైనా సరే నటించి మెప్పించగల సత్తా తనకుందంటోంది ముద్దుగుమ్మ సనాఖాన్. ‘కత్తి’ చిత్రం ద్వారా తెలుగు తెరకు పరిచయమైంది ఈ సుందరి. ప్రస్తుతం ఈ భామ ‘మిస్టర్ నోకియా’ చిత్రంలో మనోజ్ సరసన కథానాయికగా నటిస్తోంది. ఈ సందర్భంగా సనాఖాన్ మాట్లాడుతూ ‘కథలో నా పాత్రకెంత ప్రాధాన్యత వుందన్న విషయం గురించే నేనెక్కువగా ఆలోచిస్తాను. నా పాత్ర చిత్రణ సంతృప్తికరంగా అనిపిస్తే ఎలాంటి చిత్రంలో నటించడానికైనా నేను సిద్ధమే. అభినయ ప్రధాన పాత్రల్ని చేస్తూనే హద్దుమీరని గ్లామర్ పాత్రలు చేయడానికి నాకెలాంటి అభ్యంతరం లేదు. ‘మిస్టర్ నోకియా’లో చక్కటి పాత్రని చేస్తున్నాను. నా గత చిత్రాలకు భిన్నంగా పాత్ర చిత్రణ వుంటుంది’ అని చెప్పింది. ప్రేమికుల రోజు ఏం చేశారని ప్రశ్నిస్తే...‘నాకు నా కుటుంబ సభ్యుల ప్రేమ తప్పితే బయట ప్రేమ గురించి అంతగా తెలియదు. ఒకవేళ ఎవరైనా వచ్చి నన్ను ప్రేమిస్తానంటే సింపుల్‌గా వారికొక కౌగిలింత ఇచ్చి నో చెప్పేస్తా’ అని చెప్పుకొచ్చింది.