Posted: 03/09/2013 09:33 AM IST

పెళ్ళయినవారికి రాజకీయాల్లో శ్రద్ధ తగ్గుతుందా?

రాహల్ గాంధీ అలాగే భావిస్తున్నారట.  పెళ్ళై పిల్లలు కలిగితే వారిని అభివృద్ధి చేసే పనిలో పడి దేశ సేవ కుంటుపడుతుందని భావిస్తున్నట్టుగా రాహుల్ గాంధీ పార్టీ సభ్యులతో అన్నారు.  ఈ మధ్య చురుగ్గా పార్టీ పగ్గాలు పట్టుకుని నడిపిస్తూ నిర్విరామంగా పార్లమెంటు సభ్యులూ, ఇతర  పార్టీ సభ్యులతో సమావేశాలు, చర్చల్లో పాల్గొంటున్న రాహుల్ తన మనసులోని మాటను అలా వెల్లడి చేసారు.  

అంటే తను బ్రహ్మచారి కాబట్టి ఫుల్ టైం దేశ సేవలోనే వినియోగించగలుగుతానని, అందులో తనకి పోటీ ఎవరూ రాలేరని రాహుల్ చెప్పకనే చెప్తున్నారు.  ఎవరి అభిప్రాయాలు వారివి అందులో తప్పు పట్టటానికేముంది.  అయితే దాన్ని మరో విధంగా అర్థం చేసుకోకూడదనే ఉద్దేశ్యంతో ఆయన దానికి వివరణ కూడా ఇచ్చారట.  అలాగని పార్టీలో అందరూ పెళ్ళిచేసుకోకుండా ఉండాలని కాదు అని చెప్పారు.  ఈ అబ్బాయికి వేరే ఏ ఆలోచనలూ అంటూ ఏమీ ఉండవు కాబట్టి సంపూర్ణంగా రాజకీయాల్లో గడపటానికి అవకాశం ఉంటుందని ఆయన అభిప్రాయమట.  

అదే సందర్భంలో తనను తాను పారాచ్యూట్ గా పోల్చుకుంటూ తనంతట తానుగా రాజకీయాల్లోకి ఎదగాలనే తన లక్ష్యాన్ని కూడా రాహుల్ గాంధీ బయటపెట్టారు.  అంటే కుటుంబం వలన సంక్రమించే రాజకీయ పదవి కోసం కాకుండా తాను ఒక వ్యక్తిగా పాటుపడి సంపాదించుకుంటానంటున్నారాయన.

 వివాహ బంధం, సంతాన బంధాలు లేకుండా రాజకీయాల్లో రాహుల్ చెప్పినట్టుగా పనిచేస్తున్నవారిలో, జయలలిత, మాయావతి, మమతా బెనర్జీ, నవీన్ పట్లాయక్, ఉమా భారతి, ఎపిజె అబ్దుల్ కలామ్ లాంటి కొందరున్నారు.  నరేంద్రమోదీ కుటుంబం నుంచి విడిపోయి జీవిస్తుండటం వలన బ్రహ్మచారి కూటమిలోకి వస్తారనే అనుకుందాం.  వరసగా రెండు సార్లు ప్రధాని గా బాధ్యతలు చేపట్టిన అటల్ బిహారీ వాజ్ పేయ్ కూడా బ్రహ్మచారే.

-శ్రీజ