Posted: 05/16/2012 06:16 PM IST

ఏకంగా తిరుమల లాంటి గుడికి ప్రధాన అర్చకుడిగా ఉన్న వారు సైతం డబ్బున్న వారి సేవలో తరిస్తున్నారు. తిరుమల అర్చకులు కూడా డబ్బున మహరాజుల సేవలో తరించిపోతున్నారు.  తిరుమల వేంకటేశ్వరుడి సన్నిధిలో డబ్బున వారిదే హవా అనే విమర్శలు చాలా రోజులుగానే ఉన్నాయి. ఉన్న వారికి ఒక తరహా మర్యాదలు జరిగితే సామాన్య భక్తులకు మాత్రం ఛీత్కారాలే ఎదురవుతున్నాయి. స్వామి వారి సేవలో తరించాల్సిన అర్చకులు డబ్బులకు దాసోహమంటున్నారు. తాజాగా తిరుమల దేవస్థానం ప్రధానార్చకులు రమణ దీక్షితులు ముకేష్ అంబానీ కుమారిడి సేవలో తరించడం వివాదాస్పదంగా మారింది.

ముకేష్ అంబానీ కుమారుడు దైవ దర్శనం కోసం తిరుమల వచ్చాడు. దర్శనం చేసుకున్న తరువాత  గెస్ట్ హౌస్ లో ఉన్న అంబానీ కుమారుడి వద్దకు వచ్చి రమణ దీక్షితులు ఆశీర్వచనం పలకడంతో వివాదాస్పదం అయింది. గతంలో కూడా ఇదే తరహాలో రమణ దీక్షితులు అంబానీల గెస్ట్ హౌస్ వద్దకు వెళ్లి ఆశీర్వచనాలు పలకడంతో వివాదాస్పదం కావడంతో అప్పుడు టీటీడీ ఆయనకు మెమోలు జారీచేసింది. అయినా మరోసారి రమణదీక్షితులు అంబానీల గెస్ట్ హౌస్ కు వెళ్లి ఆశీర్వచనం పలకడం వివాదాలకు దారితీసింది.  గతంలో  పెద్ద అంబానీ కుటుంబాన్ని  కలవడం ఓ ఎత్తయితే తాజాగా తిరుమలకు వేంచేసిన చిన్న అంబానీ సేవలో కూడా అయ్యవారు తరించిపోయారు. 2010లో తిరుమలకు వచ్చిన ముఖేశ్ అంబానీ గెస్ట్ హౌస్ కు వెళ్లి మరీ రమణ దీక్షితులు వేద ఆశీర్వాదం అందించారు. అది అప్పట్లో వివాదాస్పదమయింది. అప్పటి కార్యనిర్వహణాధికారి ఐవైఆర్  కృష్ణ  రావు రమణ దీక్షితులు కు మెమో జారీచేశారు. ఆ తరువాత దీనిపై దీక్షితులు కోర్టుకు వెళ్లనా ఆయననే తప్పుపట్టింది. తిరుమల నిబంధనల ప్రకారం దీక్షితులు చర్య తప్పు.

అయితే వారం క్రితం ఇదే సంఘటన తిరిగి రిపీట్అయింది. ముఖేష్ అంబానీ కుమారుడు అనంత్ అంబానీ (17) తిరుమలకు విచ్చేశాడు. దీంతో అంబానీలంటే పడిచచ్చే దీక్షితులు అనంత్ అంబానీ ఉంటున్న గెస్ట్ హౌస్ కు వెళ్లి మరీ ఆశీర్వాదం అందించారు. దీంతో మరోసారి వివాదం చెలరేగింది. శ్రీవారి ప్రధాన అర్చకుడిగా ఉన్న దీక్షితులు మాత్రం అంబానీల ఇంటి పూజారిగా మారిపోవడం భక్తుల మనోభావాలను దెబ్బతీస్తోంది. దీనిపై శాఖా పరమయిన చర్యలు తీసుకుంటామని టీటీడీ అధికారులు చెబుతున్నారు.