Posted: 02/24/2012 03:33 PM IST

తెలుగుదేశంతో ఎన్నికల పొత్తులకు సీపీఐ రాంరాం చెప్పినట్లు కనిపిస్తున్నది. చంద్రబాబుతో రాసుకు తిరిగే విధానానికి ఇక ఫుల్ స్టాప్ పెట్టాలని ఇక్కడ జరుగుతున్న సీపీఐ రాష్ట్ర మహాసభల్లో ప్రతినిధులు అభివూపాయపడినట్లు సమాచారం. చంద్రబాబు ఇంటికి పార్టీ ప్రధాన కార్యదర్శి ఏబీ బర్ధన్ వెళ్లి కలవడంపైనా ప్రతినిధులు అభ్యంతరం వ్యక్తం చేశారని తెలిసింది. టీడీపీతో పొత్తు వద్దని అన్ని జిల్లాల ప్రతినిధులు కోరారని సమాచారం. పార్టీ ప్రధాన కార్యదర్శి బర్ధన్ ఆయన ఇంటికి వెళ్ల్లి కలవడం ఏమిటి... అని వివిధ ప్రాంతాల ప్రతినిధులు తప్పుపట్టారని విశ్వసనీయవర్గాలు తెలిపాయి.

కరీంనగర్‌లో జరుగుతున్న సీపీఐ రాష్ట్ర మహాసభల మూడో రోజు వివిధ అంశాలపై తీర్మానాలు ప్రవేశపెట్టే కంటే ముందు వాడివేడిగా తాజా అంశాలపై చర్చించారు. ‘‘నాడు వ్యవసాయం దండుగ అన్నాడు. సరళీకృత ఆర్థిక విధానాలు ఆయనే పట్టుకు వచ్చాడు. తెలంగాణకు అనుకూలంగా లేడు. మనం ప్రపంచీకరణ విధానాలను వ్యతిరేకిస్తూ ఆయన సంకలో చేరేలా ఎందుకు ఉండాలి  అని ఆయా జిల్లాల నేతలు చర్చల సందర్భంగా పేర్కొన్నట్లు తెలిసింది. తెలంగాణ అంశంలో ఇకపై మరింత దూకుడుగా వెళ్లాలని కూడా పలువురు సభ్యులు సూచించినట్లు సమాచారం. ‘‘తెలంగాణకు అనుకూలంగా గత జాతీయ, రాష్ట్ర కార్యవర్గ సమావేశాల్లో తీర్మానాలు చేసినా ఉద్యమ కార్యాచరణ లేకపోవడంతో ప్రజలకు విశ్వాసం కలగడం లేదు. తెలంగాణ విషయంలో ప్రజలకు నమ్మకం కలిగించే దిశగా కార్యాచరణ రూపొందించాలి. కచ్చితంగా ఆ దిశగా ప్రజలకు విశ్వాసం కలిగించాలి’’ అని తెలంగాణ ప్రాంత సభ్యులు కోరారని తెలిసింది. ‘‘తెలంగాణ సాయుధ పోరాటం చేసిన చరిత్ర మనకు ఉంది. పార్టీ తరపున పది జిల్లాలతో కలిసి ఓ సమావేశం ఏర్పాటు చేద్దాం. తెలంగాణ కోసం మేమున్నామని ప్రజలకు విశ్వాసం కలిగిద్దాం’’ అని తెలంగాణ నేతలు అభివూపాయపడ్డారు.

కమ్యూనిస్టు పార్టీగా మనకు కొన్ని సిద్ధాంతాలు ఉన్నాయని, హుందాతనంగా, పార్టీ పంథాలో విమర్శలు చేస్తే బాగుంటుందని సూచించారని తెలిసింది. ఉప ఎన్నికలపై పార్టీ వైఖరి ఎలా ఉండాలనే అంశంపై చర్చ సాగినపుడు ఉప ఎన్నికల్లో పోటీ చేయకపోవడం ఉత్తమమని, రాజీనామా చేసి పదవులను త్యాగం చేసిన వారికి మద్దతు ఇస్తే బాగుంటుందని సభ్యులు సూచించారని సమాచారం. మొత్తానికి ఇక కామ్రేడ్ లు తెలుగుదేశంతో బంధం తెంచుకున్నట్లేనని రాజకీయ విశ్లేషకులు అంటున్నారు.