ఆకట్టుకుంటోన్న సంపూర్ణేశ్ బాబు ‘బజార్ రౌడీ’ ట్రైయిలర్

Posted: 08/17/2021 08:54 PM IST

Sampoornesh babu s bazaar rowdy movie trailer released

బర్నింగ్ స్టార్ సంపూర్ణేశ్ బాబు కథానాయకుడిగా రూపొందుతున్న 'బజార్ రౌడీ' సినిమా నుంచి ఇవాళ విడుదలైన ట్రైయిలర్ ప్రేక్షకులను ఆకట్టుకుంటోంది. వసంత నాగేశ్వర రావు దర్శకత్వంలో కేఎస్ క్రియేషన్స్ బ్యానర్ పై సందిరెడ్డి శ్రీనివాసరావు నిర్మించిన ఈ సినిమా నుంచి చిత్రబృందం ఇవాళ ట్రైయిలర్ ను విడుదల చేసింది. ఈ చిత్రంలో సంపూర్ణేశ్ బాబు సరసన నూతన హీరోయిన్ మహేశ్వరి కథానాయికగా పరిచయం అయ్యారు. తన తొలి చిత్రం కూడా రిలీజ్ కాకముందే అప్పుడే ఈ అమ్మడుకి మరో రెండు చిత్రాల్లో నటించే చాన్స్ కోట్టేసింది.

ఈ నెల 20వ తేదీన ఈ సినిమా విడుదల కానుంది. కాగా కరోనా నేపథ్యంలో లో బడ్జెట్ చిత్రాలన్నీ ఓటిటీ యాప్ లలో విడుదలకు మొగ్గుచూపుతుండగా, ఈ చిత్రాన్ని మాత్రం థియేటర్లలో విడుదల చేసేందుకు నిర్మాణ సంస్థ మొగ్గుచూపింది. ఇంతకుముందు ఈ సినిమా నుంచి వదిలిన టీజర్ కి మంచి రెస్పాన్స్ వచ్చింది. ఇప్పుడు ఈ సినిమా నుంచి ట్రైలర్ ను వదిలారు. సంపూ పాత్రను హైలైట్ చేస్తూ కట్ చేసిన యాక్షన్ విజువల్స్ బాగున్నాయి. "రౌడీలకు రామాయణం చెబితే రావణాసురుడిని ఫాలో అవుతారుగానీ, రాముడిని కాదు".. అని చెప్పిన డైలాగ్ ఆకట్టుకుంది.

దీంతో పాటు "వచ్చిన వాడు కాళీ ... నాకు ఎదురొచ్చినవాడు ఖాళీ" అనే డైలాగ్స్ సంపూర్ణేశ్ బాబు రేంజ్ కి తగ్గట్టుగా వున్నాయి. ఈ సినిమాను గురించి సంపూ మాట్లాడుతూ.. "నేను చేసిన 5వ సినిమా ఇది. మాస్ ఆడియన్స్ మరింత ఇష్టపడేలా ప్రయత్నం చేశాను. చాలామంది సీనియర్ ఆర్టిస్టులతో కలిసి పనిచేసే అవకాశం నాకు ఈ సినిమాతో వచ్చినందుకు ఆనందంగా ఉంది. మీరు ఆశించే అన్ని అంశాలు ఈ సినిమాలో ఉంటాయి. నా గత చిత్రాల మాదిరిగానే ఈ సినిమాను కూడా ఆదరిస్తారని ఆశిస్తున్నాను" అని చెప్పుకొచ్చాడు.