నటుడు సల్మాన్ ఖాన్ పై చీటింగ్ కంప్లేంట్: పోలీసుల నోటీసులు

Posted: 07/09/2021 05:36 PM IST

Salman khan sister alvira khan 6 others summoned for inquiry over cheating complaint

బాలీవుడ్ అగ్రనటుడు సల్మాన్ ఖాన్ కు పోలీసులు నోటీసులు అందించారు. ఆయనపై చీటింగ్ కేసు నమోదు చేసిన పోలీసులు విచారణకు హాజరుకావాలని పేర్కోంటూ నోటీసులు అందించారు. బాలీవుడ్ అగ్రహీరో సల్మాన్ ఖాన్ పై చీటింగ్ కంప్లెంట్ చేసింది చండీగడ్ కు చెందిన వ్యాపారి అరుణ్ గుప్తా. సల్మాన్ ఖాన్ తో పాటు ఆయన సోదరి అల్విరా ఖాన్, బీయింగ్ హ్యూమన్ ఫౌండేషన్ కు చెందిన సీఈఓ సహా అధికారులపై అరుణ్ గుప్తా చండీగఢ్ పోలీసులకు పిర్యాదు చేశారు.

చండీగఢ్ లో బీయింగ్ హ్యూమన్ జువెలరీ బ్రాండ్ స్టోర్ ను తాను 2018లో ప్రారంభించానని, దీనికి కనీసం రూ. 2.5 నుంచి 3 కోట్ల వ్యయం తనకు ఖర్చు అయ్యిందని చెప్పారు. అయితే తాను ఏర్పాటు చేసిన ‘బీయింగ్ హ్యూమన్ జువెలరీ’ బ్రాండ్ స్టోర్ కు అవసరమైన సహాయ సహకారాలత పాటు దానికి ప్రచారం కూడా నిర్వహిస్తామని సల్మాన్, ఆయన సోదరి అల్విరా ఖాన్, బీయింగ్ హ్యూమన్ ఫౌండేషన్ సీఈవో హామీ ఇచ్చారని వ్యాపారవేత్త అరుణ్ గుప్తా తన ఫిర్యాదులో పేర్కొన్నారు.

అయితే, హామీ మేరకు వారి నుంచి తనకు ఎలాంటి సహకారమూ అందలేదని, ఫలితంగా తనకు తీవ్ర నష్టం చేకూరిందని అరుణ్ గుప్తా ఆరోపించారు. ఇక బ్రాండెడ్ షోరూమ్ ప్రారంభోత్సవానికి కూడా హీరో సల్మాన్ ఖాన్ వస్తారని హామి ఇచ్చినా ఆయన రాకుండా సల్మాన్ ఖాన్ బావమరిది అయుష్ శర్మ వచ్చారని ఆయన తన పిర్యాదులో పేర్కోన్నారు. దీనిపై కేసు నమోదు చేసుకున్న చండీగఢ్ పోలీసులు సల్మాన్, అల్విరాఖాన్ తోపాటు మొత్తం 8 మందికి సమన్లు జారీ చేశారు. విచారణ కోసం ఈ నెల 13న తమ ఎదుట హాజరు కావాలని అందులో పేర్కొన్నారు.