50 కోట్ల క్లబ్ లో చేరిన ఇస్మార్ట్ శంకర్

Posted: 07/24/2019 09:05 PM IST

Ismart shankar day 6 collections ram pothineni unstoppable at box office

చాలా కాలం తర్వాత డైరెక్టర్ పూరి జగన్నాథ్ ఓ మంచి హిట్ కొట్టారు. రామ్ హీరోగా తెరకెక్కిన ‘ఇస్మార్ట్ శంకర్’ చిత్రం ప్రేక్షకులను విశేషంగా ఆకట్టుకుంటోంది. కాన్సెప్ట్ కొత్తగా ఉండటంతో బాక్సాఫీస్ వద్ద మంచి వసూళ్లు రాబడుతోంది. అయితే ఈ సినిమా వ్యక్తి మెదడును మార్పిడి చేయడమనే కాన్సెప్ట్‌తో రూపొందిందన్న విషయం తెలిసిందే. ఈ సినిమా స్ర్కిప్ట్ విషయంలోనూ పలు అరోపణలు వచ్చినా.. వసూళ్లలో మాత్రం దాని ప్రభావం కనిపించడం లేదు.

ఈ నెల 18వ తేదీన విడుదలైన ఈ సినిమాకి, మాస్ ఆడియన్స్ నుంచి మంచి రెస్పాన్స్ లభిస్తోంది. తెలుగు రాష్ట్రాల్లోని ప్రతి ప్రాంతంలోను ఈ సినిమా భారీ వసూళ్లతో దూసుకుపోతోంది. మాస్ డైలాగులతో పాటు మణిశర్మ అందించిన మాస్ మ్యూజిక్, మాస్ బాణీలు కూడా ప్రేక్షకులను రంజింపజేశాయి. దీంతో రెండు తెలుగు రాష్ట్రాలలో ఈ చిత్రం మాస్ అడియన్స్ ను బాగా ఆకర్షిస్తోంది.

6 రోజులలో ఈ సినిమా ప్రపంచవ్యాప్తంగా 56 కోట్ల గ్రాస్ వసూళ్లను సాధించినట్టుగా చార్మీ తన ట్విట్టర్ ద్వారా తెలియజేసింది. పూరి మాస్ డైలాగులు .. రామ్ నటన - డాన్స్ .. మణిశర్మ మాస్ బీట్స్ .. నభా - నిధి గ్లామర్ ఈ స్థాయి వసూళ్లకు కారణమనే అభిప్రాయాలు వ్యక్తమవుతున్నాయి. 'డియర్ కామ్రేడ్' థియేటర్లకు వచ్చేవరకూ, 'ఇస్మార్ట్ శంకర్' కి తిరుగులేదు. అందువలన వసూళ్లు మరింతగా పెరిగే అవకాశాలు ఉన్నాయని చెప్పుకుంటున్నారు.