పిల్లే ఇలా ఉంటే.. ఈవిడ తల్లి ఎలా ఉంటుందో?

Posted: 08/01/2018 08:41 PM IST

‘ఈ పిల్లే ఇలా ఉంటే.. ఈవిడ తల్లి ఎలా ఉంటుందో?’ అంటూ తన పరిస్థితిని తలచుకుంటున్నాడు అక్కినేని నటవారసుడు నాగచైతన్య. నిజమండీ.. ఇలా అయన అన్నాడో లేదు.. మన రఘుబాబు కూడా పిల్ల పిట్టలా ఇంతేవున్నా.. పొట్టంతా ఇగోనే అంటూ కామెంట్ చేశాడు. ఇదేంటి ఇలా.. అనుకుంటున్నారా.. నాగచైతన్య హిరోగా నటిస్తున్న చిత్రం ‘శైలజారెడ్డి అల్లుడు’ చిత్రంలోని ఓ సన్నివేశంలోని డైలాగ్ ఇది.

ఈ చిత్రానికి మారుతి దర్శకత్వం వహిస్తున్నారు. అను ఇమ్మాన్యుయేల్‌ కథానాయిక. శైలజారెడ్డి పాత్రను అత్యంత గంభీరంగా రమ్యకృష్ణ పోషిస్తున్నారు. సితార ఎంటర్‌టైన్‌మెంట్స్‌ పతాకంపై నాగ వంశీ ఎస్‌, పీడీవీ ప్రసాద్ ‌సినిమాను నిర్మిస్తున్నారు. గోపీ సుందర్‌ బాణీలు అందిస్తున్నారు. ఈ సినిమా టీజర్‌ను బుధవారం సాయంత్రం విడుదల చేశారు. ‘పిల్ల పిట్టలా ఇంతే ఉన్నా.. పొట్టంతా ఇగోనే’ అనే డైలాగ్‌తో టీజర్‌ ప్రారంభమైంది.

‘ఇప్పుడు నువ్వు ఐ లవ్‌ యు అని ప్రపోజ్‌ చెయ్‌‌.. ఐ లవ్‌ యు టూ అని ఒప్పుకుంటా’ అంటూ అను తన ఇగోను చైతన్య ముందు ప్రదర్శించారు. రమ్యకృష్ణ స్టైల్‌ ప్రేక్షకుల్ని ఆకట్టుకునేలా ఉంది. నాగార్జున నటించిన ‘అల్లరి అల్లుడు’ సినిమాలోని ‘నిన్ను రోడ్డు మీద చూసినది లగాయిత్తు’ పాటను ఈ సినిమా కోసం రీమేక్‌ చేశారు. ఈ రీమేక్‌ పాటలో తమన్నా ఆడిపాడినట్లు తెలిసింది. ఆగస్టు 31న సినిమా ప్రేక్షకుల ముందుకు రాబోతోంది.