కన్నకొడుకును కిడ్నాప్ చేసిన భోజ్ పురి నటుడు

Posted: 09/13/2017 12:40 PM IST

ప్రియురాలితో కలిసి కన్నకొడుకునే కిడ్నాప్ చేశాడు ఓ భోజ్ పురి నటుడు. చివరకు పోలీసులకు చిక్కి కటకటాల పాలయ్యాడు. తన నుంచి విడిపోయిన భార్య కొడుకును చూడనివ్వకపోవటంతోనే ఈ పనికి పాల్పడ్డాడు ఆ నటుడు.

ఢిల్లీలోని లక్ష్మీ నగర్ కు చెందిన ముహమ్మద్ షాహిద్ (23) భోజ్ పురి చిత్రాల్లో నటిస్తున్నాడు. అతనికి ముస్కాన్ అనే భార్య ఉండగా, షహనాజ్ అనే రెండేళ్ల కుమారుడు ఉన్నాడు. వీరిద్దరి మధ్యా ఏర్పడిన విభేదాల కారణంగా విడిపోవటంతో.. ముస్కాన్ మరో వివాహం చేసుకుంది. షాహిద్ కూడా సునయన శర్మ అలియాస్ అలీషా అనే యువతితో సహజీవనం చేస్తున్నాడు. కోర్టు ఆదేశాల మేరకు షెహనాజ్ తల్లి సంరక్షణలో ఉండగా, అతన్ని అప్పుడప్పుడూ చూసేందుకు షాహిద్ కు అనుమతి ఉంది.

అయితే గత కొన్ని రోజులగా భార్య కొడుకును చూడనివ్వటం లేదు. దీంతో ఆమెకు గుణపాఠం చెప్పాలన్న ఉద్దేశంతో సొంత కుమారుడిని ప్రియురాలి సాయంతో కిడ్నాప్ చేశాడు. ఆపై తన మాజీ భార్య నిర్లక్ష్యం వల్లే కొడుకు కిడ్నాప్ కు గురయ్యాడని కేసు పెట్టాడు. పోలీసుల విచారణలో షాహిద్ ఇంట్లోనే షహనాజ్ ఉన్నాడని తేలింది. దీంతో సినిమా ఫక్కీలో ఫ్లాన్ వేసిన నటుడిని అతని ప్రియురాలిని పోలీసులు అరెస్ట్ చేశారు.