ఈ జన్మకు అభిమానులతోనే ఉంటా: ఎన్టీఆర్

Posted: 09/11/2017 06:58 AM IST

‘నాన్నా.. ఈ జన్మకు అభిమానులతో ఉండిపోతాను. మరో జన్మలో మీ రుణం తీర్చుకుంటాను’ అంటూ తండ్రి హరికృష్ణతో జూనియర్ ఎన్టీఆర్ భావోద్వేగంతో అన్నారు. ‘జై లవ కుశ’ ప్రీ రిలీజ్ వేడుక ఆదివారం ఘనంగా జరిగింది. ఈ వేడుకలో నిర్మాత కళ్యాణ్ రామ్, హరికృష్ణ, దర్శకుడు బాబీ, మరో స్టార్ దర్శకుడు కొరటాల శివ, హీరోయిన్లు నివేథా థామస్, రాశీఖన్నా తదితరులు పాల్గొన్నారు.

'ఈ చిత్రం కథ విన్న తర్వాత అద్భుతంగా ఉందని బాబీకి చెప్పాను. ఆ తర్వాత ఈ కథ గురించి ఇద్దరు వ్యక్తులతో పంచుకున్నాను. వాళ్లిద్దరూ కూడా ‘కథ చాలా బాగుంది’ అని చెప్పారు. అయితే.. వాళ్లిద్దరి పేర్లు ఇప్పుడే చెప్పను. ఈ సినిమా హిట్ అయిన తర్వాత వాళ్ల పేర్లు చెబుతాను. ఈ సినిమా మీకు నచ్చుతుందని.. బాగుంటుందని.. హిట్టవుతుందని నా నమ్మకం...ఈ చిత్రం తప్పకుండా మన గుండెల్లో సుస్థిర స్థానం సంపాదించుకుంటుందనే నమ్మకం నాకుంది... ఈ సినిమా చూసి ఎంత బాగా తీశారని అభిమానులు అనుకోవాలి... తల్లిదండ్రులూ అనుకోవాలి' అన్నారు.

ఇక ‘జై లవ కుశ’ సినిమా కేవలం ‘జై’ ఒక్కడి సినిమా కాదండి. ఈ చిత్రం జై, లవ, కుశ.. ఈ మూడింట్లో ఏ ఒక్క పేరు పోయినా కరెక్టవదు. ఈ చిత్రం ప్రపంచంలో ఉన్నటువంటి అన్నదమ్ములందరికీ అంకితం. ఈ చిత్రం చూసి అన్నదమ్ములందరు కూడా ఇన్ స్పైర్ అవుతారని ఆ దేవుడిని మనసారా కోరుకుంటూ సెలవు తీసుకుంటున్నా’ అని జూనియర్ ఎన్టీఆర్ తన ప్రసంగాన్ని ముగించారు.

కాగా, అభిమానుల కోరిక మేరకు ఈ చిత్రంలోని ఓ డైలాగ్.. ‘ఆ రావణుడ్ని సంపాలంటే సముద్రం దాటాల.. ఈ రావణుడ్ని సంపాలంటే సముద్రమంత ద ద దా.. దా..దైర్యముండాల.. ఉందా?’ అని జూనియర్ ఎన్టీఆర్ చెప్పడంతో చప్పట్లు మార్మోగిపోయాయి. ట్రైలర్ తోపాటు పాటల ప్రోమోలను కూడా రిలీజ్ చేసేశారు.