కాలిపోయిన దగ్గుబాటి వారి థియేటర్

Posted: 08/11/2017 08:43 AM IST

దగ్గుబాటి ఫ్యామిలీకి చెందిన ఓ థియేటర్ కాలిపోయింది. ప్రకాశం జిల్లా చీరాలలోని సురేష్ థియేటర్ లో అగ్నిప్రమాదం సంభవించింది. సుమారు కోటి రూపాయల ఆస్తి నష్టం వాటిల్లి ఉంటుందని అంచనా వేస్తున్నారు.

చీరాలలో ఇప్పటికీ టూరింగ్ టాకీసులే ఉన్నాయి. అయితే ఓవైపు అన్ని థియేటర్లు ఆధునిక సౌకర్యాలతో అలరిస్తున్నా చీరాల వాసులకు మాత్రం ఆ పాత థియేటర్లే గతవుతున్నాయి. ఈ నేపథ్యంలో చర్చ్ రోడ్ లోని తమ ధియేటర్ 'సురేశ్ మహల్'ను సరికొత్త హంగులతో తీర్చిదిద్దింది దగ్గుబాటి ఫ్యామిలీ. ఏసీ, డిజిటల్ సౌండ్ వంటి హంగులతో సురేశ్ మహల్ ను సిద్ధం చేశారు.

'నేనే రాజు నేనే మంత్రి' సినిమా విడుదలతో నేడు రీఓపెనింగ్ కు ఏర్పాట్లు చేశారు. స్వయంగా రానానే ఈ కార్యక్రమంలో పాల్గొనాల్సి ఉంది. కానీ, గురువారం ఉదయం మరమ్మతు పనులు చేస్తున్న సమయంలో ఓ ఏసీ నుంచి మంటలు చెలరేగాయి. క్షణాల్లో అవి థియేటర్‌ మొత్తం వ్యాపించాయి. దీంతో సమాచారం అందుకున్న అగ్నిమాపక సిబ్బంది మంటలార్పారు. ఒక కార్మికుడికి గాయాలయ్యాయి. దీనిపై కేసు నమోదు చేసిన పోలీసులు, దర్యాప్తు ప్రారంభించారు.