రవితేజకు డ్రగ్స్ కాదు కనీసం ఆ అలవాటు కూడా లేదు: తల్లి రాజ్యలక్ష్మి

Posted: 07/17/2017 03:46 PM IST

Raviteja mother opens up about drugs issue

టాలీవుడ్ ను షేక్ చేసిన మాదక ద్రవ్యాల కేసు లో టాప్ హీరో రవితేజ పేరు కూడా వినిపించిన విషయం విదితమే. ఈ మేరకు ఆయనకు కూడా సిట్ నోటీసులు పంపిందని, త్వరలో వ్యక్తిగతంగా విచారించనుందని హైలెట్ అవుతూ వస్తోంది. ఈ నేపథ్యంలో రవితేజ గానీ, ఆయన కుటుంబ సభ్యులెవరూ దీనిపై నోరు మెదపలేదు. కానీ, ఈ సీనియర్ హీరో అమ్మ రాజ్యలక్ష్మి మీడియా ముందుకు వచ్చి ఫస్ట్ టైం మాట్లాడింది.

'రవితేజ కనీసం సిగరెట్ కూడా కాల్చడు. కానీ డ్రగ్స్ కేసులో తన పేరును ఉపయోగిస్తున్నారు. తనను భరత్ తో లింక్ చేయకండి. ఎలాంటి అలవాట్లు లేని రవితేజ ఓ జెంటిల్మన్. మా కుటుంబ ఆచారాల కారణంగానే.. తను భరత్ అంత్యక్రియలకు హాజరు కాలేదు. తమ్ముడు పోయిన బాధలో ఉండి కూడా.. నిర్మాతలు నష్టపోకూడదనే ఉద్దేశ్యంతో షూటింగ్ లో పాల్గొంటున్న మంచి వ్యక్తి నా కొడుకు' అన్నారామె. ఇక రవితేజ సోదరుడు భరత్ డ్రగ్స్ మూలంగానే ప్రాణాలు పొగొట్టుకున్నాడన్న వార్త అసత్యమని ఆమె ఖండించారు. అరెస్టయి విడుదలయ్యాక మారేందుకు యత్నించాడు. బిగ్ బాస్ షోలో పాల్గొనేందుకు సిద్ధమవుతున్న క్రమంలోనే యాక్సిడెంట్ లో ప్రాణాలు కొల్పోయాడంటూ ఆవేదన వ్యక్తం చేసింది.

ఇప్పటివరకూ తమకు ఎలాంటి నోటీసులు రాలేదని, పైగా రవితేజ 15 రోజుల నుంచి ఫారిన్ షూటింగ్ లో ఉన్నాడని ఆమె తెలిపింది. భరత్ రవికి డ్రగ్స్ అలవాటు చేశాడని కొందరు చెబుతున్నారు. అదే నిజమైతే రవితేజ ఈ స్టేజీకి ఎదిగేవాడా? అంటూ ప్రశ్నించింది. కొందరిని తప్పించేందుకు ఈ కేసులో రవితేజను ఇరికిస్తున్నారని ఆమె పేర్కొంది. రవితేజ సన్నిహితుడు, కుటుంబ వైద్యుడు కడియాల రాజేంద్ర కూడా ఈ ఆరోపణలను తోసిపుచ్చాడు. ఇంతకు ముందు పూరీ కూతురు కూడా తన తండ్రి విషయంలో వస్తున్న కథనాలపై మండిపడ్డ విషయం చూశాం.