‘జెంటిల్ మన్’గా వస్తున్న నాని... ఫస్ట్ లుక్ విడుదల

Posted: 04/15/2016 12:13 PM IST

‘ఎవడే సుబ్రమణ్యం’, ‘భలే భలే మగాడివోయ్’, ‘కృష్ణగాడి వీరప్రేమగాథ’ వంటి వరుస హ్యాట్రిక్ హిట్ చిత్రాల తర్వాత నాని హీరోగా ప్రముఖ దర్శకుడు మోహనకృష్ణ ఇంద్రగంటి దర్శకత్వంలో తాజాగా ఓ చిత్రం తెరకెక్కుతోంది. ఈ చిత్రానికి ‘జెంటిల్ మన్’ అనే టైటిల్ ఖరారు చేసారు. తాజాగా శ్రీరామనవమి పండగ సంధర్భంగా ఈ చిత్ర ఫస్ట్ లుక్ పోస్టర్ ను విడుదల చేసారు.

హీరోనా విలనా? అనే లైన్ ఈ పోస్టర్ పై కనిపిస్తుంది. అంటే సినిమాలో నాని పాత్ర ఎలా వుండబోతుందో అర్థం చేసుకోవచ్చు. గతంలో మోహనకృష్ణ ఇంద్రగంటి, నానిల కాంబినేషన్లో ‘అష్టాచమ్మా’ అనే హిట్ చిత్రం వచ్చింది. ఆ తర్వాత మళ్లీ వీరి కాంబినేషన్లో వస్తున్న చిత్రమిదే. ఇటీవలే ఈ చిత్ర షూటింగ్ పూర్తయ్యింది. ప్రస్తుతం పోస్ట్ ప్రొడక్షన్ కార్యక్రమాలు జరుగుతున్నాయి.

ఈ చిత్రాన్ని శ్రీదేవి మూవీస్ సంస్థ అధినేత శివలెంక కృష్ణప్రసాద్ నిర్మిస్తున్నారు. నాని సరసన సురభి, నివేదా థామస్ హీరోయిన్లుగా నటిస్తున్నారు. మణిశర్మ సంగీతం అందిస్తున్న ఈ చిత్ర ఆడియోను త్వరలోనే విడుదల చేయనున్నారు. రొమాంటిక్ థ్రిల్లర్ ఎంటర్ టైనర్ గా రూపొందుతున్న ఈ చిత్రాన్ని త్వరలోనే ప్రేక్షకుల ముందుకు తీసుకురానున్నారు.

అవసరాల శ్రీనివాస్, తనికెళ్ల భరణి, వెన్నెల కిశోర్, ఆనంద్, రోహిణి, 'సత్యం' రాజేశ్, రమాప్రభ, ప్రగతి, రాజశ్రీ నాయర్, శ్రీముఖి తదితరులు నటిస్తున్న ఈ చిత్రానికి కథ: డేవిడ్ నాథన్, సంగీతం: మణిశర్మ, కెమేరా: పి.జి. విందా, ఆర్ట్: ఎస్. రవీందర్, ఎడిటింగ్: మార్తాండ్ కె. వెంకటేశ్, కో-డైరెక్టర్: కోట సురేశ్ కుమార్, స్ర్కీన్ ప్లే-మాటలు-దర్శకత్వం: మోహనకృష్ణ ఇంద్రగంటి.