చీరకట్టి, కత్తిపట్టి చంపేసిన ‘నాయకి’

Posted: 03/17/2016 06:26 PM IST

సౌత్ ఇండియన్ స్టార్ హీరోయిన్ త్రిష నటిస్తున్న తొలి హర్రర్ చిత్రం ‘నాయకి’. తమిళంలో ‘నాయగి’ పేరుతో రూపొందిస్తున్నారు. ‘she watches U and catch U’ అనేది ట్యాగ్ లైన్. ‘లవ్ యు బంగారమ్’ ఫేమ్ గోవి దర్శకత్వంలో ‘లక్ష్మిరావే మా ఇంటికి’ సినిమాను నిర్మించిన మామిడిపల్లి గిరిధర్ ఈ చిత్రాన్ని నిర్మిస్తున్నారు.

ఇప్పటికే విడుదలైన పోస్టర్లు, ఫోటోలకు మంచి రెస్పాన్స్ వచ్చింది. ఇందులో త్రిష చాలా క్యూట్ గా వుండటంతో పాటు, కాస్త కన్నింగ్ లుక్స్ తో ఆకట్టుకుంటుంది. అయితే తాజాగా ఈ చిత్ర ఫస్ట్ లుక్ టీజర్ ను విడుదల చేసారు. ఇందులో త్రిష హీరోయిన్ పాత్రలో నటిస్తున్నట్లుగా కనిపిస్తుంది. ఏదో రివేంజ్ డ్రామా తరహాలో ‘నాయకి’ చిత్రం రూపొందుతున్నట్లుగా కనిపిస్తోంది.

ప్రస్తుతం ఈ చిత్ర షూటింగ్ చివరి దశకు చేరుకుంది. తెలుగు, తమిళ, కన్నడ భాషలలో ఒకేసారి ఈ చిత్రాన్ని రూపొందిస్తున్నారు. హర్రర్, థ్రిల్లర్ ఎంటర్ టైనర్ గా రూపొందుతున్న ఈ చిత్ర ఆడియోను మార్చి నెల చివర్లో విడుదల చేసి, ఏప్రిల్ లో సినిమాను విడుదల చేయడానికి సన్నాహాలు చేస్తున్నారు.

ఈ చిత్రంలో గణేష్ వెంకట్రామన్, బ్రహ్మానందం, జీవీ, సత్యంరాజేష్, జయ ప్రకాష్, సుష్మరాజ్, కోవై సరళ, మనోబాల తదితరులు తారాగణం. ఈ చిత్రానికి ఛాయాగ్రహణం: జగదీష్ చీకటి, సంగీతం: రఘు కుంచె, పాటలు: భాస్కరభట్ల, ఎగ్జిక్యూటివ్ ప్రొడ్యూసర్ రాంబాబు కుంపట్ల, కళ కె.వి.రమణ, కూర్పు: గౌతంరాజు.