షారుక్ ఖాన్ చెంప చెల్లుమనిపించిన భామ

Posted: 03/01/2016 05:38 PM IST

బాలీవుడ్ బాద్షా షారుక్ ఖాన్ ను ఓ మహిళ చెంప చెళ్లుమనిపించిందట. ఈ విషయాన్ని స్వయంగా షారుక్ ఖాన్ చెప్పుకొచ్చారు. షారుక్ ఖాన్ నటిస్తున్న ‘ఫ్యాన్’ చిత్ర ట్రైలర్ ను తాజాగా విడుదల చేసారు. ఈ ట్రైలర్ విడుదల కార్యక్రమంలో పాల్గొన్న షారుక్ ఖాన్ తన పాత అనుభవాలను చెప్పుకొచ్చారు.

ఈ కార్యక్రమంలో ‘ఓ మహిళ మిమ్మల్ని కొట్టిందట కదా?’ అంటూ షారుక్ ను ఓ అభిమాని ప్రశ్నించగా.. అవునని షారుక్ అంగీకరించాడు. అంతటితో ఆగకుండా ఆ సంఘటనను అభిమానులతో పంచుకున్నాడు. ఓసారి రైల్లో ప్రయాణిస్తున్నపుడు తాను రిజర్వ్ చేసుకున్న బెర్త్ పై మగాళ్లను ఎవర్నీ కూర్చోనివ్వకుండా... ఇది నా సీటు.. నేను రిజర్వ్ చేసుకున్నానంటూ అక్కడి వారితో వాగ్వాదానికి దిగారట షారుక్. ఇంతలో బోగీలోకి వచ్చిన ఓ మహిళనుద్దేశించి... మీరు కూర్చోవచ్చుగానీ.. మగాళ్లు కూర్చోవడానికి వీల్లేదంటూ ఆమెకు సీట్ ఆఫర్ చేశారట షారుక్. దీంతో ఆగ్రహానికి గురైన ఆమె ‘ఇది నీది కాదు.. అందరిదీ’ అంటూ షారూక్ చెంప చెల్లుమనిపించిందని షారుక్ తన పాత అనుభవాలను అభిమానులతో పంచుకున్నారు.

షారుక్ ఖాన్ హీరోగా నటిస్తున్న ‘ఫ్యాన్’ చిత్రం ట్రైలర్ ప్రస్తుతం యూట్యూబ్ లో కొత్త రికార్డులను క్రియేట్ చేస్తుంది. మనీష్ శర్మ దర్శకత్వంలో తెరకెక్కుతున్న ఈ చిత్రాన్ని ఆదిత్య చోప్రా భారీ బడ్జెట్ తో నిర్మిస్తున్నారు. భారీ అంచనాలతో రూపొందుతున్న ఈ చిత్రాన్ని వేసవి సెలవుల్లో ఏప్రిల్ 15న ప్రపంచ వ్యాప్తంగా గ్రాండ్ గా విడుదల చేయనున్నారు. మరి ఈ సినిమా ఎలాంటి విజయం సాధిస్తుందో, అభిమానులకు ఎలాంటి ఆనందాన్ని అందిస్తుందో త్వరలోనే తెలియనుంది.