రుద్రమదేవి ఓవర్సీస్ హక్కులు అమ్మకం

Posted: 08/17/2015 10:29 AM IST

Anushka rudramadevi overseas rights sold out

శ్రీమతి రాగిణీ గుణ సమర్పణలో గుణా టీం వర్క్స్ బ్యానర్ పై ప్రముఖ దర్శకుడు గుణశేఖర్ స్వీయ దర్శకనిర్మాణంలో తెరకెక్కుతున్న తాజా చిత్రం ‘రుద్రమదేవి’. ఇప్పటికే షూటింగ్ పూర్తి చేసుకొని, పోస్ట్ ప్రొడక్షన్ కార్యక్రమాల్లో బిజీగా వుంది. పోస్ట్ ప్రొడక్షన్ కార్యక్రమాలు కూడా శరవేగంగా జరుగుతున్నాయి.

ఈ చిత్రాన్ని తెలుగు, తమిళం, మలయాళం భాషలలో గ్రాండ్ గా సెప్టెంబర్ 4వ తేదిన ప్రపంచ వ్యాప్తంగా విడుదల చేయనున్నారు. ఈ సంధర్భంగా ఈ చిత్ర ప్రమోషన్ కార్యక్రమాలు భారీ ఎత్తున్న మొదలుపెట్టారు. ఇందులో భాగంగా ‘రుద్రమదేవి రథం’ ను ఏర్పాటు చేసి ప్రచారం చేస్తున్నారు. ఇప్పటికే ఈ సినిమాపై భారీ అంచనాలు ఏర్పడ్డాయి.

అంతే కాకుండా ఓవర్సీస్ లో కూడా భారీ క్రేజ్ ఏర్పడింది. తాజా సమాచారం ప్రకారం ఓవర్సీస్ లో ఈ చిత్ర హక్కులు భారీ మొత్తానికి అమ్ముడుపోయాయి. దాదాపు 4కోట్ల రూపాయలకు ‘రుద్రమదేవి’ ఓవర్సీస్ హక్కులను సొంతం చేసుకున్నారు. ఇలా అన్ని ఏరియాలలో కూడా రుద్రమదేవి చిత్రానికి భారీగా బిజినెస్ జరుగుతుండటంతో చిత్ర యూనిట్ చాలా సంతోషంగా వున్నారు.

రుద్రమదేవి పాత్రలో అనుష్క నటించగా, గోనగన్నారెడ్డి పాత్రలో స్టైలిష్ స్టార్ అల్లు అర్జున్ నటించాడు. అలాగే ఈ చిత్రంలో రానా ఓ కీలక పాత్రలో నటించాడు. నిత్యామీనన్, ప్రకాష్ రాజ్, కృష్ణంరాజు తదితరులు ముఖ్య పాత్రలలో నటించారు. ఇళయరాజా సంగీతం అందించిన ఆడియో ఇప్పటికే విడుదలై మంచి టాక్ ను సొంతం చేసుకుంది.