ఎట్టకేలకు షామిలిని ‘కోడి’ వరించింది..?

Posted: 07/25/2015 01:41 PM IST

Shamili huge offer vishal pandemkodi sequel tamil movie meera jasmine

బాలనటిగా ఎన్నో హిట్ చిత్రాల్లో నటించిన షామిలి.. ‘ఓయ్’ చిత్రం ద్వారా కథానాయికగా ఎంట్రీ ఇచ్చింది. అయితే.. ఆ సినిమా ఆమెకు ఆశించిన ఫలితాన్ని ఇవ్వలేదు. దీంతో తీవ్ర నిరాశకు గురైన ఆమె.. మళ్లీ ఏ సినిమా ఒప్పుకోలేదు. కొన్నాళ్ల తర్వాత తిరిగి అవకాశాల కోసం ప్రయత్నిస్తే.. ఈమెకు ఏ ఆఫర్ దక్కలేదు. అయినప్పటికీ తన ప్రయత్నాలు కొనసాగిస్తూ వచ్చింది. ఈ క్రమంలోనే ఈ అమ్మడికి తాజాగా ఓ భారీ సినిమాలో నటించే ఛాన్స్ దక్కింది.

గతంలో విశాల్ హీరోగా నటించిన ‘పందెం కోడి’ సినిమా అటు తమిళంతోపాటు ఇటు తెలుగులోనూ మంచి విజయం సాధించిన విషయం తెలిసిందే! ఇప్పుడు ఈ సినిమాకి సీక్వెల్ తీసేందుకు విశాల్ ఫిక్స్ అయ్యాడు. ఇప్పటికే ఈ సినిమాకి సంబంధించిన అన్ని కార్యక్రమాలు దాదాపు పూర్తయ్యాయి. త్వరలోనే షూటింగ్ ప్రారంభం కానుంది కూడా! ఇక ఇందులో హీరోయిన్ కోసం ఎంతోమందిని అన్వేషించారు. ఆ మధ్య ఈ సినిమాలో అగ్రకథానాయికలు నటించనున్నారని వార్తలు కూడా వచ్చాయి. అయితే.. చివరికి షామిలిని హీరోయిన్ గా తీసుకున్నట్లు సమాచారం. అలాగే.. గతంలో వచ్చిన ‘పందెంకోడి’ సినిమాలో కథానాయికగా నటించిన మీరా జాస్మిల్ ఈ సీక్వెల్ చిత్రంలో ఒక ప్రధాన పాత్ర పోషిస్తోంది.

చాలా గ్యాప్ తర్వాత షామిలికి ఈ సీక్వెల్ సినిమాలో నటించే అవకాశం రావడంతో ఆమె దీనిపై ఎన్నో ఆశలు పెట్టుకుంది. ఈ సినిమా సక్సెస్ అయితే తనకు తదుపరి చిత్రాల్లో నటించేందుకు బోలెడన్ని ఆఫర్లు వచ్చిపడతాయని ఆశిస్తోంది. అటు.. కొంతకాలంగా ఆశించిన స్థాయి విజయం అందుకోలేకపోతున్న విశాల్ కూడా ఈ సినిమా భారీ విజయం సాధిస్తుందని ఆశిస్తున్నాడు. మరి.. వీరిద్దరి ఆశయాలు నెరవేరుతాయో లేదా తెలియాలంటే సినిమా విడుదల వరకు వేచి చూడాల్సిందే!