క్షమాపణలు కోరిన బాహుబలి రచయిత

Posted: 07/24/2015 12:12 PM IST

‘బాహుబలి’ చిత్రం ప్రపంచ వ్యాప్తంగా కలెక్షన్ల మోత మోగిస్తుంటే ఇటీవలే ఈ సినిమాలో గిరిజనులను కించపరిచే విధంగా డైలాగులు, సన్నివేశాలు వున్నాయంటూ మధురైలో ‘బాహుబలి’ ప్రదర్శించబడుతున్న ఓ థియేటర్ పై తమిళ పులి సంస్థకు చెందిన కొంతమంది కార్యకర్తలు పెట్రోల్ బాంబ్ దాడి చేసిన విషయం తెలిసిందే.

ఈ సినిమాలోని కొన్ని సన్నివేశాలు, డైలాగ్స్ వలన తమ మనోభావాలు దెబ్బతిన్నాయంటూ, అందువల్ల వాటిని తక్షణమే తొలగించాలని వారు డిమాండ్ చేసారు. అయితే ఈ విషయంపై ‘బాహుబలి’ చిత్ర తమిళ వర్షెన్ కు మాటలు రాసిన రచయిత మదన్ కార్కీ ఎట్టకేలకు స్పందించాడు.

ఈ సినిమాలో తాను ఎవరినీ కించపరచడానికి డైలాగ్స్ రాయలేదని, అవి కేవలం సినిమాలోని పలు సన్నివేశాలకు అనుగుణంగా వచ్చాయని, ఒకవేళ ఎవరినైనా కించపరిచే విధంగా ఏమైనా డైలాగ్స్ వుంటే వాటిని తక్షణమే తొలగించడానికి ప్రయత్నాలు చేస్తానని మదన్ ఓ ప్రకటన విడుదల చేసాడు.

రాజమౌళి దర్శకత్వంలో తెరకెక్కిన ఈ చిత్రం తెలుగు, తమిళం, మలయాళం, హిందీ భాషలలో ప్రపంచ వ్యాప్తంగా విడుదలై భారీ కలెక్షన్ల మోత మోగిస్తుంది. ప్రభాస్, రానా, రమ్యకృష్ణ, తమన్నా, సత్యరాజ్, అనుష్క, ప్రభాకర్ ప్రధాన పాత్రలలో నటించారు. ఎం.ఎం.కీరవాణి సంగీతం అందించారు.