‘బాహుబలి’ ఆడియో వేడుకలో మోసపోకండి?

Posted: 06/13/2015 01:41 PM IST

భారతీయ చిత్రపరిశ్రమలో మునెపెన్నడూలేని విధంగా అత్యంత భారీ బడ్జెట్ తో ‘బాహుబలి’ చిత్రం తెరకెక్కుతోంది. దర్శకధీరుడు రాజమౌళి తెరకెక్కిస్తున్న ఈ చిత్రంలో ప్రభాస్, రానా, అనుష్క, తమన్నాలు ప్రధాన పాత్రల్లో నటిస్తున్నారు. ఇటీవలే ఈ సినిమా ట్రైలర్ విడుదల కాగా.. తాజాగా ఆడియోని విడుదల చేస్తున్నారు. నిజానికి ఈ మూవీ ఆడియో వేడుక మే 31న హైదరాబాద్ లో జరగాల్సింది కానీ.. ఉండగా భద్రతా కారణాల దృష్ట్యా పోలీసులు అనుమతి ఇవ్వలేదు. దీంతో ఈ మూవీ ఆడియో వేడుకను తిరుపతికి మార్చారు. ఈ క్రమంలోనే అక్కడ ఎస్వీ యూనివర్శిటీ గ్రౌండ్స్‌లో ఈ వేడుక ఏర్పాట్లను ఘనంగా నిర్వహించారు.

ఈ ఆడియో వేడుక నిర్వహణను రాజమౌళి బాహుబలి టీం ఎంతో ప్రతిష్టాత్మకంగా తీసుకుంది. రాజమౌళితో పాటు ప్రధాన యూనిట్ మెంబర్స్ అంతా అక్కడే తిష్టవేసి ఏర్పాట్లను పర్యవేక్షించారు. ఆడియో వేడుకను గ్రాండ్ సక్సెస్ చేసేందుకు పూర్తిస్థాయి వ్యూహంతో ఏర్పాట్లు చేశారు. ముఖ్యంగా భద్రతా ప్రణామాల విషయంలో ఏమాత్రం రాజీ పడకుండా కట్టుదిట్టంగా చేసినట్లు తెలుస్తోంది. మరోవైపు.. ఈ వేడుకలో భాగంగా అక్కడ చేసిన అరేంజ్ మెంట్స్ ఎంతో అద్భుతంగా వున్నాయి. భారీ ఖర్చు పెట్టిన తయారుచేసిన ఈ వేడుక సెట్స్ చూడటానికి అంగరంగ వైభవంగా వున్నాయని అభిప్రాయాలు వెలువడుతున్నాయి. ఈ వేడుక కూడా హైలైట్ గా నిలిచిపోతుందని సినీ విశ్లేషకుల అభిప్రాయం!

ఇదిలావుండగా.. బాహుబలి ఆడియో వేడుక ఏర్పాట్ల గురించి రాజమౌళి తన ట్విట్టర్ ద్వారా వెల్లడిస్తూ.. ఓ హెచ్చరిక కూడా జారీ చేశాడు. బాహుబలి ఆడియో వేడుకకు సంబంధించిన ఏర్పాట్లు పోలీస్ డిపార్టుమెంట్, బాహుబలి టీం సంయుక్తంగా నిర్వహించినట్లు తెలిపారు. ఈ వేడుకకు చిన్న పిల్లలను, పెద్దవారిని తీసుకురావొద్దని రాజమౌళి అభిమానులకు విన్నవించారు. అలాగే.. ఈ వేడుకకు సంబంధించిన పాసులు తాము అమ్మడం లేదని ఆయన స్పష్టం చేశారు. ఒకవేళ ఎవరైనా అమ్మితే.. వాటిని కొనద్దని ఆయన సూచించారు. అలా కొంటే.. కొన్నవాళ్లు మోసపోయినట్లేనని, కాబట్టి డూప్లికేట్ పాసులు ఎట్టిపరిస్థితుల్లో కొనవద్దని ఆయన పేర్కొన్నారు.

ఈ ఆడియో వేడుకకు సంబంధించిన పాసులను తాము ప్రభాస్ అభిమాన సంఘాలకు స్వయంగా అందించినట్లుగా రాజమౌళి తెలిపారు. అభిమాన సంఘాల అధ్యక్షులు, రానా మేనేజర్స్ వద్ద పాసులు లభిస్తున్నాయని.. అక్కడి నుంచి పాసులు తీసుకుని వేడుకకు హాజరవ్వొచ్చని ఆయన పేర్కొన్నారు.