ఈ బిజ్జాలదేవ లుక్ ను ‘దమ్ము’లో చూసినట్లుగా వుంది కదా!

Posted: 05/13/2015 05:10 PM IST

Nassar bijjaladeva first look poster released

తెలుగు సినీ ఇండస్ట్రీలో ప్రస్తుతం భారీ బడ్జెట్ తో, భారీ అంచనాలతో రూపొందుతున్న చిత్రం ‘బాహుబలి’. ప్రభాస్, అనుష్క, రానా, తమన్నా ప్రధాన పాత్రలలో నటిస్తున్న ఈ చిత్రంలో రమ్యకృష్ణ, నాజర్, సత్యరాజ్ లు కీలక పాత్రలలో నటిస్తున్నారు. ప్రముఖ దర్శకుడు ఎస్.ఎస్.రాజమౌళి దర్శకత్వంలో తెరకెక్కుతున్న ఈ ప్రతిష్టాత్మక చిత్రానికి సంబంధించిన ప్రమోషన్ కార్యక్రమాలు ఇటీవలే మే 1వ తేది నుంచి ప్రారంభమైన విషయం తెలిసిందే.

ఇందులో భాగంగా ఇప్పటికే ప్రభాస్, అనుష్క, రానా, తమన్నా, రమ్యకృష్ణ, ప్రభాకర్ ల పాత్రలకు సంబంధించిన ఫస్ట్ లుక్ పోస్టర్లను విడుదల చేసారు. అయితే నేడు తాజాగా ఇందులో నాజర్ నటించిన ‘బిజ్జాలదేవ’ పాత్రకు సంబంధించిన ఫస్ట్ లుక్ పోస్టర్ ను విడుదల చేసారు. ఈ పోస్టర్ ను చూస్తుంటే ‘దమ్ము’ సినిమాలో నాజర్ వేషాదారణ కూడా ఇదేవిధంగా వుంటుంది. కాకపోతే ‘దమ్ము’ సినిమాలో తెల్లని వెంట్రుకలు వుంటాయి. కానీ ఈ సినిమాలో నల్లని వెంట్రుకలున్నాయి. ఈ పోస్టర్లో గ్లాస్ పట్టుకున్న విధానం, ఆ స్టైల్ కూడా అలాగే వుంది. ఈ బిజ్జాలదేవ పోస్టర్ పూర్తిగా నిరాశపరిచిందనే చెప్పుకోవాలి.

అయినా పోస్టర్లది ఏముంది,, సినిమాలో పాత్ర నటన పరంగా బాగుంటే చాలు అనే విధంగా ఫ్యాన్స్ అభిప్రాయపడుతున్నారు. భారీ బడ్జెట్ తో రూపొందుతున్న ఈ చిత్రం ఆర్కా మీడియా బ్యానర్ పై నిర్మిస్తున్నారు. కీరవాణి సంగీతం అందిస్తున్నారు. ఈనెల 31న థియేటర్ ట్రైలర్ ను విడుదల చేయనున్నారు. ఈ చిత్రానికి సంబంధించిన మరిన్ని వివరాలు త్వరలోనే అధికారికంగా ప్రకటించనున్నారు.

Nassar Bijjaladeva First Look Poster-02