బన్నీ టైటిల్ రథం కాదంటున్న బోయపాటి

Posted: 04/29/2015 11:00 AM IST

Boyapati srinu clarifies on allu arjun movie title

స్టైలిష్ స్టార్ అల్లు అర్జున్ హీరోగా నటించిన ‘సన్నాఫ్ సత్యమూర్తి’ చిత్రం ఇటీవలే విడుదలై మంచి టాక్ తో దూసుకుపోతున్న విషయం తెలిసిందే. ఈ చిత్రం తర్వాత ప్రముఖ కమర్షియల్ మాస్ దర్శకుడు బోయపాటి శ్రీను దర్శకత్వంలో అల్లు అర్జున్ ఓ చిత్రం చేయనున్న విషయం తెలిసిందే. గీతా ఆర్ట్స్ బ్యానర్లో నిర్మాత అల్లు అరవింద్ నిర్మించనున్న ఈ చిత్రానికి థమన్ సంగీతం అందించనున్నాడు.

స్టైలిష్ రొమాంటిక్ యాక్షన్ ఎంటర్ టైనర్ గా రూపొందనున్న ఈ చిత్రంలో బన్నీ సరసన ఇద్దరు హీరోయిన్లుగా జతకట్టనున్నారు. ఈ చిత్రానికి ‘రథం’ అనే టైటిల్ ఖరారు చేసినట్లుగా గతకొద్ది రోజులుగా వార్తలొస్తున్నాయి. కానీ ఈ పుకార్లను దర్శకుడు బోయపాటి శ్రీను ఖండించారు.

ఈ వార్తలపై దర్శకుడు బోయపాటి శ్రీను స్పందిస్తూ... ఈ సినిమాకు ఇంకా ఏ టైటిల్ ను అనుకోలేదు. ‘రథం’ అనే టైటిల్ ఖరారు చేసినట్లుగా వస్తున్న వార్తల్లో ఎలాంటి నిజం లేదు. త్వరలోనే ఓ టైటిల్ ను ఖరారు చేసి, అధికారికంగా ప్రకటిస్తామని చెప్పుకొచ్చాడు.

ఈ సినిమాలో అల్లు అర్జున్ 8 ప్యాక్ బాడీ గెటప్ లో కనిపించనున్నాడని, ఇందుకోసం బన్నీ కసరత్తులు కూడా ప్రారంభించాడని వార్తలొస్తున్నాయి. మరి ఈ వార్తల్లోని నిజనిజాలు తెలియాలంటే మరికొద్ది కాలం వేచిచూడాల్సిందే.