శృతితో కాకుండా తమన్నాతో రొమాన్స్

Posted: 03/30/2015 11:52 AM IST

వంశీ పైడిపల్లి దర్శకత్వంలో ప్రముఖ భారీ బడ్జెట్ చిత్రాల సంస్థ PVP బ్యానర్లో ప్రముఖ నిర్మాత ప్రసాద్.వి.పోట్లూరి ఓ భారీ మల్టీస్టారర్ చిత్రం తెరకెక్కిస్తున్న విషయం తెలిసిందే. అక్కినేని నాగార్జున, కార్తీలు ప్రధాన పాత్రలలో నటిస్తున్న ఈ చిత్రంలో ముందుగా శృతిహాసన్ ను హీరోయిన్ గా ఎంపిక చేసుకున్నారు.

మరికొద్ది రోజుల్లో షూటింగ్ లో పాల్గొనాల్సిన సమయంలో... ఈ ప్రాజెక్టు నుంచి శృతి తప్పుకోవడంతో ఈ చిత్ర నిర్మాత ప్రసాద్ చాలా ఆగ్రహం వ్యక్తం చేసారు. ఈ విషయంపై లీగల్ గా చర్యలు తీసుకోవడానికి ప్రసాద్ ప్రయత్నాలు చేస్తున్నారు. అయితే ప్రస్తుతం ఈ ప్రాజెక్టు నుంచి శృతిహాసన్ తప్పుకోవడంతో.. ఆమె స్థానంలో తమన్నాను ఎంపిక చేసారు.

ఏప్రిల్ 7నుంచి తమన్నా ఈ చిత్ర షూటింగ్ లో పాల్గొననుంది. కార్తీ సరసన తమన్నా హీరోయిన్ గా నటించనుంది. గతంలో వీరిద్దరూ కలిసి పలు సినిమాల్లో నటించారు. ఇప్పటికే ఈ చిత్ర షూటింగ్ చెన్నైలో జరుగుతుంది. మొదటి షెడ్యూల్ దాదాపు చివరి దశకు చేరుకుంది. గోపిసుందర్ సంగీతం అందిస్తున్నాడు.

భారీ బడ్జెట్ తో, భారీ అంచనాలతో తెలుగు, తమిళ భాషలలో ఏకకాలంలో రూపొందుతున్న ఈ చిత్రం దసరా కానుకగా ప్రేక్షకుల ముందుకు రానున్నట్లుగా తెలిసింది. త్వరలోనే అన్ని వివరాలు అధికారికంగా ప్రకటించనున్నారు.