నాగబాబును ప్రశ్నించిన నటి హేమ.. పరోక్షంగా భారీ సెటైర్లు

Posted: 03/25/2015 11:53 AM IST

‘మూవీ ఆర్టిస్ట్ అసోసియేషన్’ (మా) ఎన్నికల్లో అధ్యక్ష పదవి కోసం ప్రముఖ నటుడు రాజేంద్రప్రసాద్, మరియు జయసుధ పోటీ చేస్తున్నారు. రాజేంద్రప్రసాద్ కు మద్ధతు పలుకుతూ ఇటీవలే నాగబాబు, శివాజీరాజా తదితరులు ఇటీవలే ఓ ప్రెస్ మీట్ పెట్టిన విషయం తెలిసిందే. అందులో రాజేంద్రప్రసాద్ కు మద్ధతు పలుకుతూ నాగబాబు, శివాజీరాజాలు పలు వ్యాఖ్యలు చేసారు.

అయితే తాజాగా జయసుధకు మద్ధతు పలుకుతూ ఓ ప్రెస్ మీట్ ను ఏర్పాటు చేసారు. ఇందులో జయసుధకు మద్ధతు పలుకుతూ మురళీమోహన్, కృష్ణంరాజు, నరేష్, పరుచూరి వెంకటేశ్వరరావు, మంచు లక్ష్మీప్రసన్న, రఘుబాబు, హేమ తదితరులు పాల్గొన్నారు. ఈ ప్రెస్ మీట్ లో నటుడు రాజేంద్రప్రసాద్ కు మద్దతు పలికిన నాగబాబు, శివాజీరాజాలు చేసిన కామెంట్లకు కౌంటర్ గా జయసుధ మద్ధతుదారులు మాట్లాడారు.

ఈ కార్యక్రమంలో హేమ ఓ ప్రశ్నకు సమాధానంగా మాట్లాడుతూ... ఇప్పుడు రాజేంద్రప్రసాద్ గారికి ఎవరైతే ఒకాయన సపోర్టింగ్ గా వున్నారో... ఆయన మాకు ఇదివరకే ప్రెసిడెంట్ గా చేసారండి. అలా చేసినపుడు మేము దిగిపోయి ఆయనకు హ్యండ్ వర్క్ చేసాం. ఆయన కూర్చొని ఓ ఇల్లు కొన్నారు. దాని ఖరీదు 75 లక్షలు. ఇపుడు దాని విలువ 15 లక్షలు. ఒక్క కార్యక్రమం కూడా చేయలేదు. కనీసం ఏదైనా చేసి ఫండ్ కూడా ఏర్పాటు చేయలేదు. వున్న డబ్బులను ఖర్చుపెట్టి, చక్కగా వెళ్లిపోయారు. మరి ఇపుడు ఏ విధంగా బిల్డింగ్ కొంటాను, అది చేస్తాను అంటూ అడుగుతున్నారు? మీరు వున్నప్పుడు ఏం చేసారు? ఒక్కసారి ఆలోచించండి. ఆ తర్వాత మాట్లాడండి! అంటూ చెప్పుకొచ్చింది.

హేమ చేసిన ఈ కామెంట్లు నాగబాబుపైనే అని తెలుస్తుంది. ప్రస్తుతం హేమ చేసిన ఈ కామెంట్లు హాట్ టాపిక్ గా మారాయి. మరి హేమ చేసిన కామెంట్లపై నాగబాబు ఎలా స్పందిస్తారో... ఈ ‘మా’ ఎన్నికల్లో ఎలాంటి రాజకీయాలు జరుగనున్నాయో త్వరలోనే తెలియనున్నాయి.

Video Source from idlebrainlive